(یو این آئی)
جموں//
منشیات کے خلاف مہم کو جاری رکھتے ہوئے جموں و کشمیر پولیس نے جموں میں ایک بدنام زمانہ منشیات فروش کو گرفتار کرکے اس کی تحویل سے ہیرائن جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن جانی پور کی ایک ٹیم نے پلورہ تالاب کے نزدیک معمول کی چیکنگ کے دوران ایک سکوٹی کو رکنے کا اشارہ کیا لیکن سکوٹی سوار نے پولیس کو دیکھ کر جائے موقع سے فرار ہونے کی کوشش کی تاہم اس کو بر سر موقع ہی دھر لیا گیا۔انہوں نے کہا کہ تلاشی کے دوران اس کی تحویل سے۵گرام ہیرائن جیسا مواد بر آمد کیا گیا۔
ملزم کی شناخت جے پرتاب سنگھ ولد نشانت سنگھ ساکن پلورہ کے طور پر کی گئی ہے ۔
پولیس ترجمان نے بتایا کہ اس سلسلے میں پولیس اسٹیشن جانی پور میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئی ہیں۔جانی پور پولیس نے لوگوں سے منشیات کی بیخ کنی کو یقینی بنانے کیلئے بھر تعاون فراہم کرنے کی اپیل کی ہے ۔
دییں اثنا پولیس نے بارہ مولہ اور کولگام میں تین منشیات فروشوں کو گرفتار کرکے ان کے قبضے سے ممنوعہ نشیلی اشیاء برآمد کی ہے ۔
پولیس ترجمان کے مطابق، تھانہ ٹنگمرگ کی ایک ٹیم نے ایس ایچ او ٹنگمرگ کی قیادت میں فیروزپورہ مہیان کراسنگ پر ایک ناکہ قائم کیا تھا، جہاں دورانِ تلاشی یونس محمد بٹ ولد غلام محمد بٹ ساکن کنزر کو روک کر تلاشی لی گئی، جس دوران اس کے قبضے سے۶گرام بیرون شوگر جیسا مادہ برآمد ہوا۔ مذکورہ شخص کو گرفتار کرکے تھانے منتقل کیا گیا ہے جہاں وہ زیرِ حراست ہے ۔
اسی طرح کولگام پولیس نے چانسر گاوں میں قائم ایک ناکے پر ایک ٹرک کو روک کر اس میں سوار دو افراد کی تلاشی لی جس دوران ان کے قبضے سے۷۸۵ء۶ کلوگرام پوست کے بھوسے جیسا نشہ آور مادہ برآمد کیا گیا۔
گرفتار شدگان کی شناخت محمد ساحل ولد ارشاد احمد وانی ساکن سیری، رامبن (ڈرائیور) اور مجید احمد ملک ولد رفیق احمد ملک ساکن تزپورہ، محمدپورہ، کولگام کے طور پر ہوئی ہے ۔
دونوں کو گرفتار کرکے پولیس اسٹیشن منتقل کر دیا گیا ہے ، جب کہ جرم میں استعمال شدہ گاڑی کو بھی ضبط کر لیا گیا ہے ۔
پولیس نے عوام الناس سے اپیل کی ہے کہ وہ منشیات فروشی یا دیگر جرائم کی کسی بھی اطلاع قریبی تھانے کو دیں یا۱۱۲پر کال کریں۔ پولیس نے یقین دہانی کرائی ہے کہ منشیات کے خلاف مہم بھرپور طریقے سے جاری رکھی جائے گی اور ایسے عناصر کے خلاف سخت قانونی کارروائی عمل میں لائی جائے گی۔
