ایران نے امریکہ اور اسرائیل کو گھٹنے ٹیکنے پر مجبور کیا:محبوبہ مفتی

سرینگر///
پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے ایران،اسرائیل جنگ بندی کے اعلان کا خیر مقدم کرتے ہوئے ایران کے عوام کو خراج تحسین پیش کیا ہے ۔
سرینگر میں میڈیا سے بات کرتے ہوئے محبوبہ مفتی نے کہا، سب سے پہلے ، میں ایرانی عوام کو سلام پیش کرتی ہوں کہ جس جذبے اور استقلال سے انہوں نے اس جنگ کا سامنا کیا، اس نے امریکہ اور اسرائیل کو گھٹنے ٹیکنے پر مجبور کر دیا۔
پی ڈی پی صدرنے مزید کہا’’جب سے ٹرمپ اقتدار میں آئے ہیں، انہوں نے امریکی صدارت کے منصب کو مذاق بنا کر رکھ دیا ہے ۔ وہ خود نہیں جانتے کہ اگلا قدم ان کا کیا ہوگا یا وہ کیا کہنے والے ہیں۔ ایسے غیر سنجیدہ طرز عمل سے بین الاقوامی سیاست میں مزید عدم استحکام پیدا ہو رہا ہے ‘‘۔
محبوبہ نے زور دے کر کہا کہ مشرق وسطیٰ کے حالات دنیا بھر کے امن و استحکام پر اثرانداز ہوتے ہیں، اور ایسے وقت میں قیادت کا ذمہ دار ہونا ناگزیر ہے ۔
ان کا کہنا تھا کہ عالمی سطح پر طاقت کے زور پر مسائل کو حل کرنے کے بجائے مذاکرات اور سفارت کاری کے ذریعے پرامن حل تلاش کرنا وقت کی اہم ضرورت ہے ۔