حاجیوں کاپہلا قافلہ آج سرینگر پہنچے گا‘ دوسرا ۲۶جون کو متوقع

فریضہ حج کی ادائیگی کے بعد جموں کشمیر سے تعلق رکھنے والے عازمین حج کی وطن واپسی کا سلسلہ کل (منگل) سے شروع ہو رہا ہے ۔ پہلا قافلہ، جو۴مئی کو سرینگر سے روانہ ہوا تھا، کل شام جدہ سے واپسی پر سرینگر ایئرپورٹ پہنچے گا۔
جموں و کشمیر حج کمیٹی کے چیف ایگزیکٹو آفیسر‘ ڈاکٹر شجاعت احمد قریشی نے بتایا کہ پہلے قافلے میں شامل ۱۷۸عازمین کی فلائٹ کل شام ساڑھے آٹھ بجے سرینگر ایئرپورٹ پر لینڈ کرے گی۔
امیگریشن اور دیگر کارروائیوں میں تقریباً ایک گھنٹہ صرف ہوگا، اس لیے رشتہ داروں سے گزارش ہے کہ وہ رات نو سے ساڑھے نو بجے کے درمیان ایئرپورٹ پہنچیں تاکہ حاجیوں کا استقبال بروقت اور باعزت انداز میں کیا جا سکے ۔
ڈاکٹر قریشی کے مطابق، پہلے قافلے کے بعد کچھ دنوں تک حج پروازیں معطل رہیں جس کے نتیجے میں دوسرا قافلہ۲۶جون کو سرینگر واپس آنے کی توقع ہے ۔انہوں نے کہا کہ اس سال کا حج بحمداللہ بہت اچھا اور منظم رہا۔ تمام حاجی حضرات خیریت سے ہیں۔
حج کمیٹی کے چیف ایگزیکٹو آفیسر نے مزید کہا کہ حج کمیٹی، ایئرپورٹ حکام اور ضلعی انتظامیہ نے واپسی کے لیے تمام انتظامات مکمل کر لیے ہیں تاکہ حاجیوں اور ان کے رشتہ داروں کو کسی قسم کی پریشانی کا سامنا نہ کرنا پڑے ۔
اس دوران حج۲۰۲۶کا اعلان جولائی۲۰۲۵میں متوقع ہے ، کیونکہ وزارت حج و عمرہ مملکت سعودی عربیہ کی جانب سے حج ۲۰۲۶(ہجری(۱۴۴۷)کیلئے انتظامی امور کی ابتدائی ہدایات ۸جون کو جاری کر دی گئی ہیں ۔
حج کمیٹی آف انڈیا کے چیف ایگزیکٹو آفیسر شا نواس۔ سی (آئی اے ایس) کے دستخط سے جاری سرکولر میں ایسے تمام ہندوستانی عازمین حج کو جو حج(۱۴۴۷ہجری) میں حج کمیٹی آف انڈیا کے وساطت سے فریضہ حج ادا کر نے کے خواہش مند ہیں، ہدایتی مشورہ دیا گیا ہے کہ وہ مشین ریڈایبل بین الاقوامی پاسپورٹ جس کی سفری معیاد کم از کم۳۱دسمبر۲۰۲۶تک ہو،نئے پاسپورٹ کیلئے درخواست گزاروں کوحج۲۰۲۵میں نسک مسار پورٹل کی ابتدائی شرط کی بنیاد پر، مشورہ دیا جاتا ہے کہ وہ ’سر نیم / آخری نام کا کالم خالی نہ چھوڑ یں۔‘