اودھم پور میں افیون کی کاشت تباہ، ملزم گرفتار:پولیس

جموں//
منشیات کے خلاف جنگ کو وسیع پیمانے پر جاری رکھتے ہوئے پولیس نے ضلع اودھم پور کے دنگی دھر مونگاری علاقے میں افیون کی کاشت کو تباہ کر دیا اور اس سلسلے میں ایک شخص کو گرفتار کر لیا۔
ایک پولیس ترجمان نے اپنے ایک بیان میں بتایا کہ اودھم پور کے دنگی دھر مونگاری علاقے میں افیون کی کاشت کاری کے بارے میں مصدقہ اطلاع موصول ہونے پر ایک خصوصی پولیس ٹیم تشکیل دی گئی جس نے جائے موقع پر پہنچ کر ایک شخص کو اپنی ذاتی اراضی پر افیون کاشت کرتے ہوئے پایا۔
ملزم کی شناخت مان سنگھ ولد پربھات سنگھ ساکن دنگی دھر مونگاری کے طور پر کی گئی۔انہوں نے کہا کہ یہ کارروائی ایگزیکٹیو مجسٹریٹ فرسٹ کلاس مونگاری اور دیگر آزاد گواہوں کی موجودگی میں انجام دی گئی۔
بیان میں کہا گیا کہ افیون کی کاشت کو موقع پر ہی تباہ کر دیا گیا اور ملزم کو گرفتار کیا گیا۔انہوں نے کہا کہ اس سلسلے میں پولیس اسٹیشن اودھم پور میں این ڈی پی ایس ایکٹ کے تحت ایک کیس درج کیا گیا۔
اودھم پور پولیس نے منشیات کی بیخ کنی کے لئے عوام سے بھر پور تعاون فراہم کرنے کی اپیل کی ہے ۔