امر ناتھ جی یاترا اور عیدالاضحی پربھات کا سکیورٹی انتظامات کا جائزہ

سرینگر//
ڈائریکٹر جنرل آف پولیس جموں و کشمیر‘ نالن پر بھات نے پولیس کنٹرول روم کشمیر میں پولیس اور نیم فوجی دستوں کے افسران کے ساتھ مشترکہ میٹنگ کی صدارت کی، جس میں آئندہ امرناتھ جی یاترا‘عید الاضحیٰ اور دیگر تقریبات کے سیکورٹی انتظامات کا جائزہ لیا گیا۔
ایک پولیس ترجمان کے مطابق میٹنگ کے آغاز میں، شرکاء نے امرناتھ جی یاترااور عید الاضحیٰ کے سلسلے میں تجویز کردہ سیکورٹی انتظامات کے بارے میں چیئر کو بریفنگ دی، جس میں مختلف فورسز کے درمیان مؤثر ہم آہنگی کی اہمیت پر زور دیا گیا۔
میٹنگ کے دوران، ڈی جی پی جموں و کشمیر نے سٹینڈرڈ آپریٹنگ پروسیجرز (ایس او پیز) پر عمل درآمد کے لیے ہدایات جاری کیں اور ساتھ ہی خطرات کو کم کرنے اور شرکاء کی حفاظت کو یقینی بنانے کے لیے پیشگی اقدامات کی اہمیت پر زور دیا۔
پر بھات نے فیلڈ افسران کو ہدایت کی کہ وہ دہشت گردی کے ماحول کو ختم کرنے کے لیے اپنی کوششیں تیز کریں اور آنے والی تقریبات کے لیے مضبوط سیکورٹی انتظامات کو یقینی بنائیں۔
ڈی جی پی نے افسران کو ہدایت کی کہ وہ اینٹی سبوتاج ٹیموں کو یاترا کے راستوں پر تعینات کرکے سیکورٹی اقدامات کو مضبوط بنائیں اور ممکنہ خطرات کو کم کریں۔ انہوں نے افسران کو جدید ٹیکنالوجی اور رئیل ٹائم مانیٹرنگ کے ذریعے نگرانی اور خطرے کی نشاندہی کی صلاحیت بڑھانے کی بھی ہدایت کی۔
میٹنگ کا اختتام اس عزم پر ہوا کہ تمام تقریبات کے کامیاب اور ہموار انعقاد کے لیے اعلیٰ ترین سطح کی تیاری اور ہم آہنگی کو یقینی بنایا جائے گا۔