یہ صاحب ہو کیا رہا ہے … کوئی ہمیں بھی بتائیے کہ آخر یہ چل کیا رہا ہے ؟ابھی تو کل کی ہی بات ہے… بالکل کل کی بات جب ہم اس بات پر بات کررہے تھے کہ آیا ’ہیٹ ویو‘ کی وجہ سے کشمیر میں پہلے ہی…مقررہ وقت سے پہلے ہی گرمائی تعطیلات تو نہیںہو ں گی… اپنی وزیر تعلیم کے بھی کان پک گئے اور… اور اس لئے پک گئے کہ ان سے درجنوں بار پوچھا جارہا تھا کہ میڈم گرمائی تعطیلات کب ہورہی ہیں… کس دن سے ہو رہی ہیں… کل پرسوں میں ہو رہی ہیں؟…اخبارات میں ڈل جھیل میں غوطہ زن نیم برہنہ لڑکوں کی تصاویر چھپ رہی تھیں … اور محض کچھ دنوں کے بعد آج ہم ایک اور تصویر دیکھ رہے ہیں… بالکل مختلف تصویر دیکھ رہے ہیں… اور اس تصویر میںہم یہ دیکھ رہے ہیںکہ… کہ وادی کے بالائی حصوں میںبرفباری ہو رہی ہے… راز دان ٹاپ کو برف کی سفید چادر نے ڈھک لیا ہے اور… اور ہیٹ ویو نو دو گیارہ ہو گئی ۔ہم کہہ چکے ہیں… پہلے بھی کہہ چکے ہیں کہ … کہ کچھ باتیں ایسی ہیں ‘ جن کو سمجھنا آپ کے اور ہمارے بس کی بات نہیں ہے … اور اس لئے نہیںہے کیونکہ اس کائنات کے تخلیق کار نے ان باتوں … ان رازوں کو اپنی ذات پاک تک محدود رکھا ہے… وہ جانتا ہے ‘ کوئی اور نہیں جانتا ہے… کوئی اور جان نہیں سکتا ہے… جاننے کا دعویٰ بھی نہیں کر سکتا ہے… اس سب کے بارے میں جاننے کا دعویٰ نہیں کر سکتا ہے جو اللہ میاں جانتے ہیں… کوئی بڑی بات نہیں … بڑی بات کیا اس کیلئے یہ کوئی بات ہی نہیں کہ… کہ وہ ہمیں اور آپ کو گرما میں سرما اور سرما میں گرما کا احساس دلائے … یہ کوئی بات نہیں ہے… ہاں بات اگر ہے تو … تو یہ بات ہے کہ وہ سرکاری اساتذہ حضرات جو دن میں ہی سرمائی تعطیلات کا خواب دیکھنے لگے تھے… اور ان تعطیلات میں گھوم پھر نے کے منصوبے بنا رہے تھے … اللہ میاں نے ان کے ان منصوبوں پر پانی … معاف کیجئے برفباری کی ہے … اوران کے منصوبے کو فی الحال سرد خانے میں ڈال دیا ہے… یقینا ہیٹ ویو ہوگی اور پھر سے ہو گی … گرما میں نہیں ہو گی تو… تو پھر کب ہو گی … لیکن گرما میں برفباری ‘ یہ ٹھنڈ صرف وہ کر سکتا ہے… وہ جو اس پُر اسرار اور رازوں سے بھری کائنات کا خالق اور مالک ہے کوئی اور نہیں … بالکل بھی نہیں ۔ ہے نا؟
ہیٹ ویو سے برفباری تک!
