حبہ کدل میں آتشزدگی، ایک رہائشی مکان خاکستر

سرینگر//
سری نگر کے حبہ کدل علاقے میں ہفتے کی صبح آتشزدگی کے ایک حادثہ میں ایک رہائشی مکان خاکستر ہوگیا۔
ذرائع نے بتایا کہ حبہ کدل کے گدود باغ علاقے میں ہفتے کی صبح قریب ساڑھے دس بجے ایک رہائشی مکان سے آگ کے شعلے بلند ہوئے ۔
انہوں نے کہا کہ آگ لگنے کے بعد فائر ٹنڈرس جائے موقع پر پہنچ گئے اور آگ کو قابو میں کرکے مزید پھیلنے سے روک دیا۔
محکمہ فائر اینڈ ایمرجنسی کے ایک عہدیدار نے بتایا کہ آگ لگنے کی اطلاع موصول ہوتے ہی فائر ٹنڈرس کو جائے موقع پر بھیج دیا گیا جنہوں نے آگ کو بھجا دیا۔
انہوں نے کہا کہ اس حادثہ میں ایک رہائشی مکان کو شدید نقصان پہنچا تاہم کسی جانی نقصان کی کوئی اطلاع نہیں ہے اور آگ لگنے کی وجوہات معلوم کی جا رہی ہیں۔
قابل ذکر ہے محکمہ فائر اینڈ ایمرجنسی سروسز سری نگر نے جموں و کشمیر میں بڑھتے ہوئے درجہ حرارت کے پیش نظر ایک ایڈوائزری جاری کی ہے جس میں تمام فائر سروس انچارجز کو ہدایت دی ہے کہ وہ آگ سے حفاظت اور احتیاطی تدابیر کے بارے میں جانکاری مہم چلائیں۔
ایڈوائزری میں عوام کے لیے کچھ نکات کا ذکر کیا گیا ہے جن میں اپنے ارد گرد آتش گیر مادوں جیسے گردو غبار، پتوں اور لاٹھیوں کو ہٹانا، بجلی کے ساکٹ کو اوور لوڈ کرنے سے گریز کرنا اور گھر میں نہ ہونے پر بجلی بند کرنا شامل ہے ۔
ایڈوائزری میں کہا گیا’’لوگوں سے یہ گزارش کی جاتی ہے کہ وہ برقی تاروں کو فرنیچر اور آتش گیر اشیاء سے دور رکھیں، بچوں کو ماچس اور لائٹر دینے سے اجتناب کریں اور مناسب وینٹیلیشن کو یقینی بناتے ہوئے گرمی کے زیادہ اوقات میں کھانا پکانے سے گریز کریں۔‘‘