’ آپریشن سندورمیں فورسز کی بہادری قابل تعریف‘

فوج کی تینوں شاخوں کے سربراہوں کی سی ڈی سی کی سربراہی میں صدر ہند سے ملاقات ‘ آپریشن سندور پر بریفنگ
نئی دہلی//
صدر دروپدی مرمو نے سرحد پار دہشت گردی کے خلاف’آپریشن سندور‘میں ہندوستانی افواج کی بہادری، لگن اور کامیابی کی تعریف کی ہے ۔
چیف آف ڈیفنس اسٹاف (سی ڈی ایس) جنرل انیل چوہان اور تینوں مسلح افواج کے سربراہوں نے بدھ کو یہاں راشٹرپتی بھون میں مسز مرمو سے ملاقات کی اور انہیں ’آپریشن سندور‘کے بارے میں آگاہ کیا۔
صدر تینوں مسلح افواج کے سپریم کمانڈر ہیں۔ جنرل چوہان نے آرمی چیف جنرل اوپیندر دویدی، فضائیہ کے سربراہ ایئر چیف مارشل اے پی سنگھ اور بحریہ کے سربراہ ایڈمرل دنیش ترپاٹھی کے ساتھ صدر کو پاکستان اور پاکستان کے زیر قبضہ جموں و کشمیر میں دہشت گردوں کے خلاف کی گئی کارروائی کے بارے میں آگاہ کیا۔
راشٹرپتی بھون نے اس میٹنگ کی اطلاع سوشل میڈیا ’ایکس‘پر شیئر کرتے ہوئے کہا کہ ان اعلیٰ فوجی حکام نے صدر کو آپریشن سندور کے بارے میں آگاہ کیا۔
پوسٹ میں کہا گیا’’صدر مرمو نے اپنی مسلح افواج کی بہادری اور لگن کی تعریف کی، جس نے دہشت گردی کے خلاف ہندوستان کے ردعمل کو شاندار کامیابی سے ہمکنار کیا‘‘۔
پہلگام میں پاکستان کے اکسانے پر دہشت گردوں کے ذریعہ معصوم شہریوں کے قتل کے جواب میں ہندوستانی فورسز نے۷/۶مئی کی درمیانی شب پاکستان اور پاکستان کے زیر قبضہ جموں و کشمیر میں دہشت گردوں کے ٹھکانوں اور ان کے حامیوں کے خلاف ایک آپریشن شروع کیا تھا، جس میں۱۰۰سے زیادہ خوفناک دہشت گردوں کو ہلاک کیا گیا تھا۔
اس کارروائی کے بعد پاکستان کی افواج نے ہندوستانی سویلین اور فوجی ٹھکانوں کو نشانہ بنانے کی کوشش کی جسے ہندوستان نے ناکام بنا دیا اور اس کے کئی فوجی اڈے اور فضائی دفاعی نظام تباہ کر دیا گیا۔
دریں اثنا چیف آف ڈیفنس اسٹاف اور تینوں افوج کے سربراہان نے آپریشن سندور کے کامیاب انعقاد اور اس دوران تینوں افواج کے درمیان ہم آہنگی کے بارے میں تھنک ٹینک کے ماہرین اور سابق فوجیوں کے ساتھ گہرائی سے تبادلہ خیال کیا۔
انٹیگریٹڈ ڈیفنس ہیڈکوارٹر کی طرف سے بدھ کی صبح بتایا گیا کہ چیف آف ڈیفنس اسٹاف جنرل انل چوہان، آرمی چیف جنرل اپندر دیویدی، نیوی چیف ایڈمرل دنیش کے ترپاٹھی اور ایئر فورس چیف ایئر چیف مارشل اے پی سنگھ نے صبح ڈیفنس تھنک ٹینک کے ماہرین اور سابق فوجیوں کے ساتھ آپریشن سندور کے کامیاب انعقاد میں ہندوستانی مسلح افواج کے اقدامات اور آپریشنل عمل پر تبادلہ خیال کیا۔
اس مکالمے کے دوران آپریشن کے دوران تینوں فوجوں اور دیگر عہدوں کے درمیان شاندار ہم آہنگی پر خصوصی طور پر بات کی گئی۔ اس دوران فوجوں کے درمیان باہمی اور دیگر افواج کے ساتھ ہم آہنگی کا ایک غیر معمولی نمونہ دیکھنے کو ملا۔
اعلیٰ فوجی قیادت نے اس بات پر بھی روشنی ڈالی کہ کس طرح تینوں افواج نے واضح طور پر بیان کردہ اسٹریٹجک رہنمائی کے ذریعے آپریشن کو کامیابی سے مکمل کیا۔