اے سی بی نے بانہال میں ایک سرکاری ملازم کے خلاف غیر متناسب اثاثہ جات کا مقدمہ دائر کیا

سرینگر//
جموں کشمیر انٹی کورپشن بیورو (اے سی بی) نے بانہال علاقے میں ایک سرکاری ملازم کے خلاف غیر متناسب اثاثہ جات جمع کرنے کے الزام میں مقدمہ درج کیا ہے ۔
بیورو کے ایک ترجمان نے اپنے ایک بیان میں بتایا کہ تحصیل سپلائی آفس (ٹی ایس او) بانہال میں تعینات محکمہ سی اے پی ڈی کے نائٹ چوکیدار کے شاہی لال شوکت علی کے خلاف یہ مقدمہ درج کیا گیا ہے ۔
ترجمان نے کہا کہ یہ مقدمہ خفیہ تحقیقات کے بعد درج کیا گیا جس میں منکشف ہوا کہ ملزم نے اپنے اور اپنے اہلخانہ کے نام پر معلوم ذرائع آمدن سے کافی زیادہ منقولہ و غیر منقولہ جائیدادیں حاصل کی ہیں۔
بیان میں کہا گیا’’تحقیقات سے یہ بات سامنے آئی ہے کہ ملزم نے اہم اثاثے جمع کیے ہیں، جن میں جموں کے اسرار آباد میں ایک عالی شان دو منزلہ رہائشی مکان، بانہال میں ایک اور دو منزلہ مکان، مختلف مقامات پر متعدد اراضی پلاٹ، اور عالی شان گاڑیاں شامل ہیں‘‘۔
انہوں نے کہا کہ اس کے علاوہ مالیاتی دستاویزات اور ایسے شواہد بھی ملے ہیں جو کہ بے حساب دولت کی نشاندہی کرتے ہیں۔
ترجمان نے بتایا کہ تفتیش کے دوران عدالت سے تلاشی کے وارنٹ حاصل کیے گئے اور آزاد گواہوں اور مجسٹریٹوں کی موجودگی میں ملزم کی سدھرا اور بانہال میں واقع رہائش گاہوں کی وسیع تلاشی لی گئی۔
پولیس ترجمان نے کہا کہ تلاشی کے دوران مختلف بینکوں سے تعلق رکھنے والی۱۶چیک بکیں اور پانچ پاس بکس، مختلف مقامات پر جائیدادوں سے متعلق زمینی دستاویزات، ایک پاسپورٹ جس میں بین الاقوامی سفری تاریخ درج ہے ، غیر ملکی کرنسی نوٹ، سینئر افسران،،جن میں اسسٹنٹ ڈائریکٹر، سی اے پی ڈی، رام بن اور ٹی ایس او بانہال شامل ہیں، کے تین سرکاری ربڑ سٹیمپ اور دیگر مجرمانہ مواد ضبط کیا گیا۔ان کا کہنا ہے کہ اس ضمن میں مزید تفتیش جاری ہے ۔