جموں کشمیر میں۵۵۰میڈیکل اَفسران کی اسامیاں خالی:ڈار

جموں//
حکومت نے آج ایوان کو بتایا کہ جموں و کشمیر میں تقریباً ۵۵۰میڈیکل اَفسران ( ایم اوز) کی اسامیاں خالی ہیں جبکہ۱۸۱میڈیکل اَفسران کی بھرتی کا عمل جاری ہے ۔
وزیر زرعی پیداوار جاوید احمد ڈار وزیر صحت و طبی تعلیم کی جانب سے ایوان میں ارکان قانون ساز ڈاکٹر سجاد شفیع اور جاوید حسن بیگ کے مشترکہ ایک سوال کا جواب دے رہے تھے ۔
عمرعبداللہ نے مزید بتایا کہ ضلع بارہمولہ کے شیری اور کریری بلاکوں میں۵۷صحت کے اِدارے فعال ہیں۔ بلاک کریری میں میڈیکل اَفسران اور پیرامیڈیکل سٹاف سمیت منظور شدہ عمل کی تعداد۱۵۷ہے جن میں سے ۱۲۱عملے کے ارکان تعینات ہیں جبکہ۳۶؍اَسامیاں خالی ہیں۔
اسی طرح بلاک شیری میں۳۳۰منظور شدہ عملے میں سے۲۲۳تعینات ہیں اور۱۰۷؍اَسامیاں خالی ہیں۔اُنہوں نے کہا کہ اِن اَسامیوں میں ریگو لر کیٹگری اور نیشنل ہیلتھ مشن (این ایچ ایم) شامل ہے ۔
وزیر نے کہا کہ کمیونٹی ہیلتھ سینٹر (سی ایچ سی) چندوسہ کیلئے زمین حاصل کرنے کا عمل جاری ہے اورر یاستی اراضی کی نشاندہی کیلئے معاملہ متعلقہ ریونیو حکام کے ساتھ اُٹھایا گیا ہے ۔
ڈار نے مزید کہا کہ سال۲۰۲۲۔۲۰۲۱ کے دوران این ٹی پی ایچ سی لاریڈورا کیلئے زمین کے معاوضے کے طور پر۸لاکھ روپے کی رقم جاری کی گئی تھی جو ضلع ترقیاتی کمشنر بارہمولہ کے پاس رکھی گئی تھی۔ تاہم، مالی برس کے اختتام کی وجہ سے یہ رقم زمین کے مالک کو ادا نہیں کی جا سکی اور فنڈز منسوخ ہو گئے ۔
تاہم مذکورہ زمین پر این ٹی پی ایچ سی کی تعمیر مکمل ہو چکی ہے اوریہ مرکز ستمبر ۲۰۲۴ء سے نئی تعمیر شدہ عمارت میں کام کر رہا ہے ۔
وزیرنے ایوان کو آگاہ کیا کہ محکمہ میڈیکل اَفسران کی خالی اَسامیوں کے مسئلے کو حل کرنے کیلئے اہم اور مستقل کوششیں کر رہا ہے جو اِس وقت تقریباً۵۵۰اَسامیاں موجود ہیں۔
وزیر زراعت کے مطابق۱۸۱میڈیکل اَفسران کی بھرتی کا عمل جموں و کشمیر پبلک سروس کمیشن (جے کے پی ایس سی) میں جاری ہے اور جیسے ہی یہ اِنتخاب مکمل ہوگا، ان ڈاکٹروں کو اُن طبی اداروں میں تعینات کیا جائے گا جہاں عملے کی شدید کمی ہے ۔
ڈار نے ایوان کو مزید بتایا کہ اِس کے علاوہ محکمہ۹۱منتخب میڈیکل اَفسران کی ویٹ لسٹ پر بھی کام کر رہا ہے جنہیں جموں و کشمیر کے پسماندہ علاقوں میں تعینات کیا جائے گا تاکہ صحت سہولیات کو مزید مضبوط کیا جا سکے ۔اُنہوں نے ضلع بارہمولہ میں میڈیکل اَفسران کی خالی اَسامیوں کے حوالے سے ایوان کو بتایا کہ منظور شدہ۲۷۵؍اَسامیوں میں سے۲۱۹پر تعیناتی ہو چکی ہے جبکہ۵۶؍اَسامیاں مختلف طبی بلاکوں میں خالی ہیں۔
وزیر نے مزید کہا کہ حال ہی میں تعینات کئے گئے۳۶۵میڈیکل اَفسران میں سے۳۹کو ضلع بارہمولہ میں تعینات کیا گیا ہے تاکہ عملے کی کمی کو دور کیا جا سکے اور صحت خدمات کو بہتر بنایا جا سکے ۔