منصوبہ بندی کے مطابق اہداف کو درست طریقے سے تباہ کیا گیا: راجناتھ سنگھ

نئی دہلی//
وزیر دفاع راج ناتھ سنگھ نے چہارشنبہ کے روز کہا کہ آپریشن سندور کے تحت مقرر کردہ اہداف کو منصوبہ بندی کے مطابق تباہ کردیا گیا۔
سنگھ نے کہا کہ بھارت نے اپنی سرزمین پر حملے کا جواب دینے کے حق کا استعمال کیا ہے۔ انہوںنے پہلگام دہشت گردانہ حملے کے خلاف مسلح افواج کی جانب سے جوابی کارروائی کی ستائش کرتے ہوئے کہا کہ ہماری کارروائی بہت سوچ سمجھ کر کی گئی ہے۔
وزیر دفاع نے چھ ریاستوں اور دو مرکز کے زیر انتظام علاقوں میں بارڈر روڈ آرگنائزیشن کے۵۰ بنیادی ڈھانچے کے پروجیکٹوں کے افتتاح کے موقع پر کہا’’ہم نے صرف ان لوگوں کو مارا جنہوں نے ہمارے بے گناہوں کو قتل کیا‘‘۔
سنگھ نے کہا’’دہشت گردوں کے حوصلے توڑنے کے مقصد سے، یہ کارروائی صرف ان کے کیمپوں اور دیگر بنیادی ڈھانچے تک محدود ہے‘‘۔
وزیر دفاع نے کہا کہ ہندوستانی فوج نے درستگی ، چوکس اور حساسیت کے ساتھ کام کیا ہے ۔ انہوں نے مزید کہا ’’ہم نے حساسیت کا مظاہرہ کرتے ہوئے کسی بھی شہری آبادی کو متاثر نہیں ہونے دیا ہے‘‘۔
سنگھ نے کہا کہ آپریشن سندور کے ذریعے ہماری افواج نے دہشت گردوں کے تربیتی کیمپوں کو تباہ کرکے منہ توڑ جواب دیا ہے۔’’ میں اپنی مسلح افواج کی بہادری کو سلام پیش کرتا ہوں۔‘‘
ادھروزیر خارجہ ایس جے شنکر نے جاپان، فرانس، جرمنی اور اسپین کے وزرائے خارجہ سے ٹیلی فون پر بات کی اور انہیں پہلگام دہشت گردانہ حملے کے ذمہ دار دہشت گردوں کے ٹھکانوں کے خلاف کی گئی کارروائی کے بارے میں بتایا۔
ڈاکٹر جے شنکر نے یہاں ایکس پر ان ٹیلی فون بات چیت کی تفصیلات شیئر کیں۔ انہوں نے کہا کہ ان کی جاپان کے وزیر خارجہ تاکیشی ایویا سے ٹیلی فون پر بات چیت ہوئی ہے ۔’’ میں۲۲؍اپریل کے دہشت گردانہ حملوں کی جاپان کی شدید مذمت کی تعریف کرتا ہوں۔ آج صبح سرحد پار دہشت گردی کے بنیادی ڈھانچے کے خلاف ہندوستان کی کارروائی پر تبادلہ خیال کیا گیا‘‘۔
وزارت خارجہ نے ایک اور پوسٹ میں کہاکہ’’فرانس کے وزیر خارجہ جین نول بیروٹ اور جرمن وزیر خارجہ جوہان وڈے فل کے ساتھ مشترکہ ٹیلی کانفرنس کی۔ پہلگام دہشت گردانہ حملے کے تناظر میں ان کی یکجہتی اور حمایت کی تعریف کی۔ دہشت گردی کے خلاف صفر رواداری کو یقینی بنانے پر تبادلہ خیال کیا‘‘۔
ڈاکٹر جے شنکر نے کہا کہ انہوں نے ہسپانوی وزیر خارجہ جوز مینوئل البریز سے بات کی۔ سرحد پار دہشت گردی کے خلاف ہندوستان کے مضبوط اور متوازن جواب پر تبادلہ خیال کیا۔
دریں اثنا وزیر خارجہ نے بدھ کو قطر کے وزیر اعظم اور وزیر خارجہ محمد بن عبدالرحمن بن جاسم الثانی کو ٹیلی فون کیا اور انہیں پاکستان اور پاکستان کے زیر قبضہ کشمیر میں کی گئی کارروائیوں سے آگاہ کیا۔
ڈاکٹر جے شنکر نے’ایکس‘پر اپنی پوسٹ میں لکھا’’قطر کے وزیر اعظم اور وزیر خارجہ محمد بن عبدالرحمن بن جاسم الثانی سے بات کرنا اچھا لگا۔ سرحد پار دہشت گردی کا مقابلہ کرنے کے لیے ہندوستان کے ہدف اور متوازن جواب پر تبادلہ خیال کیا‘‘۔
۲۲؍اپریل کو، جموں و کشمیر کے پہلگام میں ایک گھناؤنے دہشت گردانہ حملے میں ۲۶لوگ مارے گئے تھے ، جس کی ذمہ داری لشکر طیبہ کی ایک شاخ مزاحمتی فورس نے قبول کی تھی۔ ہندوستانی افواج نے گزشتہ رات پاکستان اور پاکستان کے زیر قبضہ کشمیر میں نو مقامات کے خلاف درست، نپے ہوئے ، بلا اشتعال، ذمہ دارانہ اور متناسب کارروائی کی، جس سے دہشت گردوں کے بنیادی ڈھانچے کو بھاری نقصان پہنچا۔