نو کریاں نہ ملنے پر نوجوان طبقہ نشے کی اور راغب ہو رہا ہے :چودھری

جموں//
جموںکشمیر کے نائب وزیر اعلیٰ سریندر کمار چودھری نے ہفتے کے روز کہاکہ گزشتہ سات برسوں کے دوران مرکزی زیر انتظام علاقے میں منشیات کے کاروبار میں غیر معمولی اضافہ ہوا ہے ۔
چودھری نے کہاکہ نوکریاں نہ ملنے کی وجہ سے جموں وکشمیر کا نوجوان نشے کی لت میں مبتلا ہو رہا ہے ۔
ان باتوں کا اظہارنائب وزیر اعلیٰ نے جموں میں نامہ نگاروں سے بات چیت کے دوران کیا۔
چودھری نے کہاکہ جموں وکشمیر میں نوجوانوں کیلئے روزگار کے مواقعے میسر نہیں جس وجہ سے نوجوان اپنے غموں کو بلانے کی خاطر منشیات اور نشیلی ادویات کا استعمال کررہے ہیں۔
نائب وزیر اعلیٰ نے کہاکہ گزشتہ سات برسوں کے دوران جموں وکشمیر میں منشیات کی وبا عام ہوئی اور اس پر اب قدغن لگانے کی ضرورت ہے ۔
ان کا مزید کہنا تھا کہ چونکہ جموں وکشمیر پولیس ایل جی انتظامیہ کے ماتحت ہے لہذا لیفٹیننٹ گورنر کو اس حوالے سے سخت نوعیت کے اقدامات اٹھانے چاہئے ۔
نائب وزیر اعلیٰ نے کہاکہ جموں وکشمیر میں بے روزگاری میں تشویشناک حد تک اضافہ ہوا ہے اور لوگوں کے مسائل حل کرنے کی خاطر ریاستی درجے کی بحالی ناگزیر ہے ۔
چودھری نے کہاکہ جموں صوبے کے ساتھ گزشتہ سات برسوں کے دوران نا انصافی کی گئی جس وجہ سے آج یہاں کے دکانداروں اور تاجروں کو مشکلات کا سامنا کرناپڑرہا ہے ۔