عوام سے کئے گئے تمام وعدوں کو پورا کریں گے:عمر

سرینگر//
جموں و کشمیر کے وزیر اعلی عمر عبداللہ نے ہفتہ کے روز کہا کہ ان کی حکومت عوام سے کئے گئے تمام وعدوں کو پورا کرے گی اور مبینہ طور پر شیڈو کابینہ تشکیل دینے والی بی جے پی کو تنقید کا نشانہ بناتے ہوئے کہا کہ ہندوستان میں ایسا کوئی نظام نہیں ہے۔
ان کاکنا تھا’’صرف ایک کابینہ ہے۔ ہمارے ملک میں کوئی شیڈو کابینہ نہیں ہے۔ بی جے پی نے اب تک یہاں حکومت کی ہے۔ اب عوام کی حکومت اپنا کام کرے گی‘‘۔
وزیر اعلیٰ نے کہا’’سائے کی کوئی ضرورت نہیں ہے۔ ہم نے عوام سے ان کی توقعات پر پورا اترنے کا وعدہ کیا ہے اور ہم اپنے وعدے پر قائم ہیں‘‘۔
عمرعبداللہ نے غلام سبطین مسعودی کی رہائش گاہ کا دورہ کیا جو اس ہفتے کے اوائل میں انتقال کرگئے تھے۔
مسعودی نیشنل کانفرنس کے ایم ایل اے حسنین مسعودی کے بھائی اور میر واعظ عمر فاروق کے سسر تھے۔
رمضان کے مقدس مہینے کی تیاریوں کا جائزہ لینے کے لئے اپنے اجلاس کے بارے میں بات کرتے ہوئے عمرعبداللہ نے کہا کہ لوگوں کو تمام سہولیات فراہم کرنا حکومت کی ذمہ داری ہے۔
وزیر اعلیٰ نے کہا کہ ہم نے ہر محکمہ کا جائزہ لیا اور ہر سہولت کو یقینی بنانے کی ہدایت کی، چاہے وہ سحری اور افطار کے وقت بجلی کی فراہمی ہو، پانی کی فراہمی ہو، راشن کی فراہمی ہو، صفائی ستھرائی ہو یا ٹریفک ہو۔ امید ہے کہ حکومت یہ تمام اقدامات اٹھائے گی۔
ایک ترجمان نے بتایا کہ چیف منسٹر نے یہاں لیفٹیننٹ گورنر منوج سنہا سے بھی ملاقات کی اور جموں و کشمیر قانون ساز اسمبلی کے آئندہ بجٹ سیشن سے متعلق مختلف امور پر تبادلہ خیال کیا۔
بجٹ اجلاس پیر سے شروع ہوگا۔
اس سے پہلے وزیرا علیٰ نے آج صبح ڈاکٹر غلام سبطین مسعودی کے گھر واقع حیدر پاور ٹینگہ پورہ جاکر وہاں اُن کے لواحقین اور پسماندگان خصوصاً سینئر پارٹی لیڈر و ایم ایل اے پانپور جسٹس (ر) حسنین مسعودی اور میرواعظ کشمیر مولوی ڈاکٹر عمر فاروق کیساتھ تعزیت کی اور ڈھارس بندھائی۔
اس موقعے پر مرحوم کے حق میں دعائے مغفرت اور کلمات بھی ادا کئے گئے اور مرحوم کو خراج عقیدت پیش کیا گیا۔ انہوں نے سوگوار خاندان کیساتھ اظہارِ یکجہتی کیا اور شریک غم ہونے کا بھی اظہار کیا۔
اس سے قبل عمر عبداللہ نے راج باغ جاکر وہاں معروف تاجر حاجی غلام نبی کپرا کے پسماندگان اور لواحقین کیساتھ تعزیت پُرسی کی اور ڈھارس بندھائی۔ اس موقعے پر مرحوم کے حق میں کلمات ، دعائے مغفرت اور فاتحہ خوانی بھی ادا کی گئی۔
وزیر اعلیٰ نے مرحوم کو خراج عقیدت پیش کیا اور شیر کشمیر کاروان کیساتھ کپرا خاندان کی بے لوث خدمات اور قربانیوں کو بھی یاد کیا۔
عمر عبداللہ نے سابق ڈی آئی جی کشمیر مرحوم شیخ حافظ اختر کے گھر واقعہ راج باغ جاکر تعزیت کی اور ڈھارس بندھائی اور مرحوم کے حق میں کلمات اور دعائے مغفرت بھی ادا کئے گئے ۔
وزیر اعلیٰ نے مرحوم کے لائق فائق فرزندان خصوصاً سرمد حفیظ کی ڈھارس بندھائی ۔ انہوں نے مرحوم کو خراج عقیدت پیش کیا اور کہاکہ مرحوم کے ایک بہتر اور باصلاحیت منتظم رہے اور کافی دیر تک شیر کشمیر شیخ محمد عبداللہ کیساتھ بھی اپنے فرائض انجام دیئے ۔