پی ڈی پی اسمبلی میں تین اہم بل پیش کرے گی:پرہ

سرینگر//
پی ڈی پی کے لیڈر اور رکن اسمبلی وحید پرہ کا کہنا ہے کہ ان کی پارٹی جموں کشمیر اسمبلی میں روزگار، منشیات پر کنٹرول اور اراضی حقوق پر تین اہم بل پیش کرے گی۔
پرہ نے نیشنل کانفرنس سمیت تمام پارٹیوں سے ان بلوں کی حمایت کرنے کی اپیل کی۔
رکن اسمبلی نے پیر کو یہاں نامہ نگاروں کو بتایا’’ہم پارٹی صدر محبوبہ مفتی کی ہدایت پر اسمبلی میں تین بڑی بلیں پیش کرنے والے ہیں جو لوگوں کو در پیش اہم مسائل کو حل کریں گی‘‘۔
پرہ نے کہا’’پہلا بل عارضی ملازموں، کیجول لیبرسز اور نیڈ بیسڈ ورکروں کی نوکریوں کومستقل کرنے کے بارے میں ہے ‘‘۔
رکن اسمبلی کا کہنا تھا کہ مختلف سرکاری محکموں میں ہزاروں ورکر سالہال سے کام کر رہے ہیں لیکن ان کو کوئی جاب سیکورٹی نہیں ہے ، اس بل کا مقصد ان ملازموں کو مستقل نوکریاں دلانے اور ان کے مالی استحکام کو یقینی بنانا ہے ۔
پرہ نے کہا کہ دوسرا بل جموں و کشمیر میں شراب اور منشیات کے استعمال کے بڑھتے ہوئے خدشات کو دور کرنے کے متعلق ہے ۔
پی ڈی پی رکن اسمبلی نے نوجوانوں میں نشے کی زیادتی کے بڑھتے ہوئے مسئلے کو اجاگر کرتے ہوئے کہا کہ یہ ہمارے سماج میں ایک سنگین مسئلے کا رخ اختیار کر گیا ہے ۔
پرہ نے خطے کی سیاحت پر مبنی معیشت کو دیکھتے ہوئے عوامی مقامات پر شراب نوشی پر سخت ضابطوں کی ضرورت پر زور دیا۔
پی ڈی پی رکن اسمبلی نے کہا’’تیسرے بل کا مقصد بلڈوزر کی حکمرانی کو روکنا اور رہائشیوں کے لیے زمین کے حقوق کو محفوظ بنانا ہے ‘‘۔انہوں نے زور دے کر کہا کہ پناہ کا حق ہر شہری کا بنیادی حق ہے اور اس بل سے ریاستی اراضی، میدانوں اور روایتی کمیونٹی کی ملکیت والی جائیدادوں سے بے دخلی کو روکنے کی کوشش کی جائے گی۔
پرہ نے نیشنل کانفرنس سمیت تمام سیاسی جماعتوں سے اپیل کہ وہ پی ڈی پی کی ان تین بڑی بلوں کی حمایت کریں۔