*پونچھ میں لائن آف کنٹرول پر ہندوستان اور پاکستان کی فلیگ میٹنگ منعقد

جموں/ 21 فروری
ہندوستان اور پاکستان نے جموں و کشمیر کے ضلع پونچھ میں لائن آف کنٹرول (ایل او سی) پر جمعہ کو ایک فلیگ میٹنگ کی تاکہ سرحد پار سے فائرنگ اور آئی ای ڈی حملے کے حالیہ واقعات کے بعد کشیدگی کو کم کیا جا سکے۔
ذرائع نے بتایا کہ بریگیڈ کمانڈر کی سطح کی فلیگ میٹنگ چکن دا باغ کراسنگ پوائنٹ کے علاقے میں ہوئی جس میں دونوں فریقوں نے سرحدوں پر امن برقرار رکھنے کی ضرورت پر زور دیا۔
انہوں نے بتایا کہ 75 منٹ تک جاری رہنے والی یہ میٹنگ صبح 11 بجے شروع ہوئی۔
ذرائع نے بتایا کہ ملاقات خوشگوار ماحول میں ہوئی اور دونوں فریقوں نے سرحدوں پر امن کے وسیع تر مفاد میں جنگ بندی معاہدے کا احترام کرنے پر اتفاق کیا۔
جموں و کشمیر کی سرحدوں پر جنگ بندی کی خلاف ورزیاں 25 فروری 2021 کو دونوں ممالک کے درمیان ایک معاہدے کی تجدید کے بعد سے شاذ و نادر ہی ہوئی ہیں۔
11 فروری کو جموں خطے کے اکھنور سیکٹر میں مشتبہ دہشت گردوں کے دیسی ساختہ دھماکہ خیز مواد (آئی ای ڈی) حملے میں ایک کیپٹن سمیت ہندوستانی فوج کے دو اہلکار ہلاک اور ایک زخمی ہوگیا تھا۔
راجوری اور پونچھ اضلاع میں 10 اور 14 فروری کو ایل او سی کے پار سے چھوٹے ہتھیاروں سے فائرنگ کے الگ الگ واقعات میں دو فوجی اہلکار بھی زخمی ہوئے تھے جبکہ گزشتہ ہفتے پونچھ میں بارودی سرنگ کے الگ الگ دھماکوں میں فوج کے مزید دو جوان زخمی ہوئے تھے۔
فوری طور پر یہ معلوم نہیں ہوسکا کہ جوابی کارروائی میں پاکستان کی جانب سے کتنا نقصان ہوا ہے لیکن حکام کا کہنا ہے کہ دشمن افواج کو بھی بھاری جانی نقصان اٹھانا پڑا۔*پونچھ میں لائن آف کنٹرول پر ہندوستان اور پاکستان کی فلیگ میٹنگ منعقد