شمالی کمان کے سربراہ وادی کے تین روزہ دورے پر پہنچ گئے

سرینگر//
فوج کی شمالی کمان کے کمانڈر‘ لیفٹیننٹ جنرل اوپندرا دیویدی جو وادی کے تین روزہ دورے پر بدھ کو سرینگر وارد ہوئے ‘نے یہاں تازہ ترین سیکورٹی صورتحال کے ساتھ ساتھ سالانہ امر ناتھ یاترا کے حوالے سے کئے جارہے سیکورٹی انتظامات کا بھی جائزہ لیا۔
ایک دفاعی ترجمان نے اپنے ایک بیان میں موصوف کمانڈر کے دورہ کشمیر کے بارے میں تفصیلات فراہم کرتے ہوئے کہا کہ فوجی کمانڈر کو چنار کور کے جی او سی لیفٹیننٹ جنرل اے ڈی ایس اوجلا نے وادی کی موجودہ سیکورٹی صورتحال کے بارے میں بریفنگ دی اور انہیں مخالفین کے چیلنجز کا مقابلہ کرنے کیلئے کئے جانے والے اقدامات کے بارے میں بھی جانکاری فراہم کی۔
بیان میں کہا گیا کہ موصوف فوجی کمانڈر نے اپنے دورے کے دوران چنار کور کے سینئر افسروں کے ساتھ بات چیت کی اور لائن آف کنٹرول پر قائم مستحکم در اندازی مخالف گرڈ کی سراہنا کی۔
فوجی ترجمان نے کہا کہ لیفٹیننٹ جنرل اوپندرا دیویدی نے ایل او سی پر جنگ بندی معاہدے کی پاسداری کرنے کے لئے فوج کے نظم و ضبط کی داد دی۔انہوں نے کہا کہ موصوف کمانڈر نے وادی میں چنار کور کی طرف سے چلائے جانے والے ملی ٹینسی مخالف آپریشنز کی بھی تعریفیں کیں۔
ترجمان نے کہا کہ لیفٹیننٹ جنرل دیویدی نے مختلف ایجنسیوں کی طرف سے کشمیر میں قیام امن کی خاطر اٹھائے جا رہے اقدام کی بھی سراہنا کی۔انہوں نے بتایا کہ شمالی کمان کے کمانڈر نے سرگرم ملی ٹینٹوں کے خلاف چلائے جارہے کامیاب آپریشنز پرفوج کی سراہنا کرتے ہوئے کہا کہ وادی میں قیام امن کی خاطر فوج کی جانب سے زمینی سطح پر اقدامات اٹھائے جارہے ہیں۔
فوجی کمانڈر کو اس موقع پر وادی میں سرگرم ملی ٹینٹوں کے خلاف چلائے جارہے آپریشنز کے بارے میں جانکاری فراہم کرتے ہوئے بتایا گیا کہ فوج کسی بھی چیلنج کا مقابلہ کرنے کے لئے تیار ہیں۔
اس موقع پر ناردرن کمانڈر نے کہا کہ فوج کی جانب سے ملی ٹینٹ مخالف آپریشنز کے دوران پیشہ وارانہ صلاحیتوں کو بروئے کار لایا جارہا ہے ۔انہوں نے فوجی آفیسران پر زور دیا کہ آپریشنز کے دوران کم سے کم طاقت کا استعمال پہلی ترجیح ہونی چاہئے ۔
اُن کے مطابق وادی کشمیر میں قیام امن کی خاطر فوج کی جانب سے زمینی سطح پر اقدامات اُٹھائے جارہے ہیں۔انہوں نے بتایا کہ فوج سماج دشمن عناصر اور سرگرم جنگجووں کے منصوبوں کو ناکام بنارہی ہے جس وجہ سے وادی میں امن و امان واپس لوٹ آیا ہے ۔
دفاعی ترجمان کے مطابق عام شہریوں کے ساتھ قریبی تال میل کی وجہ سے ہی مقامی نوجوانوں کی ملی ٹینٹ تنظیموں میں شمولیت کے رجحان میں غیر معمولی کمی واقع ہوئی ہے ۔
دفاعی ترجمان نے بتایا کہ فوجی کمانڈر کو سالانہ امر ناتھ یاترا کے حوالے سے کئے جارہے سیکورٹی انتظامات کے بارے میں بھی جانکاری فراہم کی گئی۔انہوں نے بتایا کہ سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر زمینی سطح پر اقدامات اُٹھانے کی ضرورت ہے ۔