ہم پانے نہیں کھونے کے ماہر ہیں

ہم کشمیری پانے کے نہیں کھونے کے ماہرہیں… ہمیں پانا نہیں بلکہ کھونا آتا ہے…اس لئے ہم کھوتے جار ہے ہیں‘ سب کچھ جو ہمارے پاس تھا ‘ ہم کھو چکے ہیں ‘ لٹا چکے ہیں ۔ کچھ لوگ گیلانی … مرحوم سید علی گیلانی کو ایک عظیم لیڈر سمجھتے تھے… اور اس لئے سمجھتے تھے کیوں کہ وہ آخری دم تک اپنے موقف پر ’چٹان‘ کی طرح ڈٹے رہے…موقف؟مسئلہ کشمیر کا اقوام متحدہ کی قرار دادوں کے تحت حل ‘ان کا موقف تھا ۔ گیلانی صاحب اس سے کم کسی بات پر راضی نہیں ہو ئے… ہوتے تو شاید کشمیر اور کشمیریوں کا حال بے حال نہیں ہو تا … گیلانی صاحب لچک نہیں بلکہ دانشمندی اور سیاسی شعور کا تھوڑا بھی مظاہرہ کرتے تو… تو کشمیری یقینا کچھ پاتے‘ ان کے ہاتھ میں یقینا کچھ آیا ہو تا… لیکن گیلانی صاحب اس کی ’استقامت‘ اور ’چٹان‘ کی طرح موقف پر ڈٹے رہنے کی وجہ سے کشمیریوں نے سب کچھ کھودیا … وہ بھی کھودیا جوکچھ ان کے پاس تھا … جو لوگ گیلانی صاحب کو ایک کامیاب سیاستدان اور ’استیٹسمین‘ سمجھتے ہیں انہیں ایسا سمجھنے دیجئے کہ … کہ وقت نے ثابت کردیا … یہ ثابت کردیا کہ… کہ کشمیر ی کچھ حاصل کرنے کی نہیں بلکہ سب کچھ کھو دینے کی خداداد صلاحیت رکھتے ہیں… اس میں ان کا کوئی ثانی نہیں ہے… بالکل بھی نہیں ہے اور… اور گیلانی صاحب محض ایک استثنیٰ نہیں … بالکل بھی نہیں … این سی کے آغا روح اللہ اب دوسرے گیلانی صاحب بننے کی کوشش کررہے ہیں… لوک سبھا میں ان کی تقریر سنی جس میں یہ جناب ۳۷۰ کی واپسی ہی نہیں بلکہ ۱۹۵۳ سے پہلے کی پوزیشن کی بحالی کا بھی مطالبہ کررہے تھے… سننے میں یقینا… سننے میں یقینا ان کی باتیں اچھی لگتی ہیں… لیکن صاحب جب یہ باتیں زمینی حالات اور حقائق… تلخ حقائق سے ٹکرا جاتی ہیں تو… تو یہ چور چور ہو جاتی ہیں… ۳۷۰ … دفعہ ۳۷۰ دفن ہو گئی ہے اور ہمیشہ کیلئے ہو گئی ہے… اس کی بحالی کا مطالبہ کرنے ‘ بحالی کی توقع رکھنے والے بھی دفن ہو جائیں گے اور… اور کشمیر کو کچھ ہاتھ نہیں آئے گا … دفعہ ۳۷۰ کی بحالی کی راگ الاپنے کے بجائے … اس پر وقت اور توانا ضائع کرنے کے بجائے کشمیری قیادت لداخ سے کچھ سیکھتے ہو ئے مرکز سے… بی جے پی سے دفعہ ۳۷۱ کی مختلف شقوں کے تحت کشمیر کی اراضی ‘ کشمیریوں کی منفرد شناخت کے تحفظ پر بات چیت شروع کرے تو… تو ممکن ہے کہ آج نہیں تو کل کچھ بات بن جائیگی…لداخیوں کی طرح مشترکہ کوشش کی جائے تو بات بن سکتی ہے ۔ یہ کہنا کہ بی جے پی ہمیشہ اقتدار میں نہیں رہے گی … اس بات میں کوئی منطق نہیں ہے کہ… کہ تاریخ گواہ ہے کہ دفعہ ۳۷۰ کو سب سے زیادہ نقصان ‘ سب سے زیادہ کھوکھلا کانگریس نے کیا ‘ کسی اور نے نہیں کیا … بالکل بھی نہیں کیا ۔ ہے نا؟