’ پاکستان میں گرنے والا میزائل حادثے کے سوا کچھ نہیں تھا‘

سرینگر/۱۵مارچ(ویب ڈیسک)
امریکہ کے محکمہ خارجہ نے کہا ہے کہ پاکستان میں بھارتی میزائل کے گرنے پر نئی دہلی کی جانب سے موقف آگیا ہے جس کے بعد اس معاملے پر مزید تبصرہ نہیں کیا جائے گا۔
امریکی محکمہ خارجہ کے ترجمان نیڈ پرائس سے ایک پریس بریفنگ کے دوران جب صحافی نے سوال کیا کہ بھارت نے تصدیق کی ہے کہ تکنیکی خرابی کے باعث ایک میزائل پاکستان میں گرا اس پر آپ کیا کہیں گے؟ ترجمان نے اس سوال کے جواب میں کہا کہ بھارت سے پاکستان میں گرنے والا میزائل ایک حادثے کے سوا کچھ نہیں تھا۔
ترجمان نے کہا کہ بھارت کی وزارتِ دفاع نے نو مارچ کو پیش آنے والے واقعے پر تفصیلی بیان جاری کیا ہے جس پر وہ مزید تبصرہ نہیں کریں گے۔
نیڈ پرائس سے جب سوال کیا گیا کہ چند ماہ قبل بھارت میں یورینئم کی چوری کا واقعہ پیش آیا تھا جس کے الزام میں چند ملزمان کو گرفتار بھی کیا گیا، کیا اس معاملے پر بھارت سے سفارتی سطح پر کسی قسم کے تحفظات کا اظہار کیا گیا؟ اس پر نیڈ پرائس نے کہا کہ یہ واقعہ ان کے علم میں نہیں لیکن دنیا بھر میں اور خصوصاً جوہری ہتھیاروں کے حامل ملکوں میں نیوکلیئر سیفٹی پر بات چیت ہوتی رہتی ہے۔
اس دوران چینی ترجمان ڑاؤ لیجیان نے بیجنگ میں صحافیوں سے بات کرتے ہوئے کہا ’ہم متعلقہ ممالک سے جلد از جلد رابطہ اور بات چیت کرنے کے علاوہ اس واقعے کی مکمل تحقیقات شروع کرنے کا مطالبہ کرتے ہیں۔‘
چینی ترجمان نے بھارت اور پاکستان پر بھی زور دیا کہ وہ ’معلومات کے تبادلے کو مضبوط بنائیں اور اس طرح کے واقعات کے دوبارہ ہونے سے بچنے اور غلط حساب کتاب کو روکنے کیلئے بروقت اطلاع کا طریقہ کار قائم کریں‘۔
ترجمان نے کہا کہ پاکستان اور بھارت ’جنوبی ایشیا کے دونوں اہم ممالک ہیں، جو علاقائی سلامتی اور استحکام کو برقرار رکھنے کی ذمہ داریاں نبھا رہے ہیں‘۔
اس سے قبل پیر کو چین کی وزارت خارجہ کے ترجمان نے واقعے کی مشترکہ تحقیقات کے پاکستان کے مطالبے کی حمایت کی اور تمام مسائل پر دونوں پڑوسیوں کے درمیان براہ راست بات چیت کی ضرورت پر زور دیا تھا۔
خیال رہے کہ بھارت رواں ہفتے کے اوائل میں تسلیم کیا تھا کہ۹ مارچ۲۰۲۲ کو ’تکنیکی خرابی کی وجہ سے ایک میزائل حادثاتی طور پر پاکستانی علاقے میں فائر کیا گیا‘۔تاہم پاکستان نے کہا تھا کہ وہ نئی دہلی کی ’سادہ وضاحت‘ سے مطمئن نہیں ہے اور اس واقعے سے منسلک حقائق جاننے کیلئے مشترکہ تحقیقات کا مطالبہ کرتا ہے۔
بھارت میڈیا کی ایک رپورٹ میں کہا گیا تھا کہ براہموس سپرسونک میزائل کا ایک غیر مسلح، پریکٹس ورڑن بھارتی فضائیہ کی خفیہ سیٹلائٹ بیس پر معائنے کے دوران غلطی سے پاکستان میں فائر ہوگیا تھا۔