سرحدوں پر فوج کی چوکسی سے ہی ہم رات کو آرام سے سوتے ہیں:وزیر اعلیٰ

اکھنور//
جموں و کشمیر کے وزیر اعلی عمر عبداللہ نے منگل کو کہا کہ فوجیوں کی چوکس رہنے کی وجہ سے لوگ رات کے وقت آرام سے سوتے ہیں۔
وہ بھارتی فوج کی جانب سے منعقدہ سابق فوجیوں کی ریلی سے خطاب کر رہے تھے۔ اس تقریب کو بھارتی فوج نے اکھنور سے براہ راست نشر کیا۔
عمر عبداللہ نے سابق فوجی جوانوں کی خدمات اور قربانیوں کا حوالہ دیتے ہوئے کہا کہ آپ وہ لوگ ہیں جنہوں نے کل کی پرواہ نہیں کی، آپ نے اپنی پوری سروس کے دوران قربانیاں دی ہیں۔
وزیر اعلیٰ کاکہنا تھا’’اب ہماری باری ہے کہ آپ کی دیکھ بھال کریں۔ اگر ہم رات کو سوتے ہیں تو اس کی وجہ لائن آف کنٹرول پر آپ کی چوکسی ہے۔ ہمیں پختہ یقین ہے کہ آپ سرحدوں کی اچھی طرح دیکھ بھال کر رہے ہیں‘‘۔
عمر عبداللہ نے مزید یقین دلایا کہ جموں و کشمیر حکومت بھرتی کے عمل میں فوجیوں کیلئے رکھے گئے ریزرویشن کا خیال رکھے گی۔
ان کا کہنا تھا کہ بھرتی میں جو سابق فوجیوں کے لئے ریزرویشن ہے اس کو استعمال کیا جائے گا اور ان کے لئے مختص مالی اسکیموں کو عمل میں لانے کے لئے کسی رکاوٹ کو حائل نہیں ہونے دیا جائے گا۔
وزیر اعلیٰ نے کہا’’میری کابینہ میں بھی ایک سابق فوجی کا بیٹا ستیش شرما بحیثیت وزیر میری مدد کر رہا ہے اور ہم دونوں آپ کو یقین دلانا چاہتے ہیں کہ جہاں بھی آپ کو ہماری ضرروت پڑے گی ہم آپ کے ساتھ کندھے سے کندھا ملا کر چلیں گے ‘‘۔
عمرعبداللہ نے کہا کہ ہماری کوشش ہے کہ سابق فوجیوں کے ساتھ تعلقات کو مزید مستحکم کریں۔
وزیر اعلیٰ نے سابق فوجیوں پر بھی زور دیا کہ وہ نظام میں کسی بھی تشویش یا خلا کو اجاگر کریں تاکہ انہیں فوری طور پر دور کیا جاسکے۔
ان کاکہنا تھا’’اگر ہماری کوششوں میں کوئی چیلنج یا کمزوری ہے تو براہ مہربانی انہیں ہماری توجہ میں لائیں تاکہ ہم ان کو حل کرنے کیلئے مل کر کام کرسکیں۔ ہم اسی لگن کے ساتھ آپ کی خدمت کرنے کے لئے پرعزم ہیں جو آپ نے ملک کی خدمت میں دکھائی تھی۔‘‘
اس سے قبل وزیر دفاع راج ناتھ سنگھ نے جموں کے اکھنور بیلٹ میں ۱۰۸ فٹ اونچا قومی پرچم لہرایا اور ایک ہیریٹیج میوزیم کا افتتاح کیا۔ ان کے ساتھ لیفٹیننٹ گورنر منوج سنہا، وزیر اعلیٰ عمر عبداللہ، چیف آف ڈیفنس اسٹاف اور سینئر افسران بھی موجود تھے۔