کشمیر ہمیشہ سے ہندوستان کا لازم و ملزوم حصہ رہا ہے اور رہے گا :شاہ

نئی دہلی//
مرکزی وزیر داخلہ‘ امیت شاہ نے کہا ہے کہ کشمیر ہمیشہ سے ہندوستان کا لازم و ملزوم حصہ رہا ہے اور ہمیشہ لازم و ملزوم رہے گا۔
شاہ کاکہنا تھا کہ ہندوستان دنیا کا واحد جیو کلچرل ملک ہے ، جس کی سرحدیں ’جنگ یا معاہدے‘سے نہیں بلکہ ثقافت سے متعین ہوتی ہیں۔
وزیر داخلہ نے جمعرات کو یہاں کتاب’جموںکشمیر اور لداخ:تسلسل اور رابطے کا ایک تاریخی اکاؤنٹ‘کے اجراء کے موقع پر کہا’’کشمیر سے کنیا کماری تک، گندھارا سے اڈیشہ اور بنگال سے گجرات تک، ہم جہاں بھی جاتے ہیں، ہمارا ملک ثقافت سے جڑا ہوا ہے ‘‘۔
شاہ نے کہا کہ کشمیر ہمیشہ سے ہندوستان کا لازم و ملزوم حصہ رہا ہے اور ہمیشہ لازم و ملزوم رہے گا۔ان کاکہنا تھا’’اسے کسی بھی قانون سے الگ نہیں کیا جا سکتا، کوششیں کی گئیں لیکن بالآخر ان سیکشن کو ہٹا دیا گیا اور تمام رکاوٹیں ہٹا دی گئیں‘‘۔
وزیر داخلہ نے کہا کہ جو لوگ کسی ملک کی ’جیو پولیٹیکل‘کے لحاظ سے تعریف کرتے ہیں وہ ثقافت کے لحاظ سے ہندوستان کی تعریف نہیں کر سکیں گے ۔
شاہ نے کہا’’ایک ۱۵۰سال کا دور تھا جب تاریخ کا مطلب دہلی دریبہ سے لے کر بلی مارن تک اور لوٹین سے دہلی جم خانہ تک تھا۔ تاریخ ان مقامات تک محدود تھی۔ یہاں بیٹھ کر تاریخ نہیں لکھی جا سکتی۔ تاریخ صرف لوگوں سے ملنے ، ان کی زبانوں، ان کی زندگیوں اور ان کی ثقافتوں کو سمجھنے سے سمجھی جا سکتی ہے ‘‘۔
وفاقی وزیر داخلہ نے کہا کہ وقت آ گیا ہے کہ ہم خود کو اس تاریخ سے آزاد کر لیں جو حکمرانوں کو خوش کرنے کے لیے لکھی گئی تھی۔ اس پروگرام کے ذریعے میں ملک کے نامور مورخین سے درخواست کرتا ہوں کہ وہ ہماری ہزاروں سال پرانی تاریخ کو حقیقت کے ساتھ اعتماد کے ساتھ لکھیں اور اسے صداقت اور فخر کے ساتھ دنیا کے سامنے پیش کریں۔
شاہ نے کہا’’ہندوستان کو سمجھنے کیلئے ہمیں اس حقیقت کو سمجھنا ہوگا جو ہمارے ملک کو جوڑتا ہے ۔کشمیر اور لداخ کی تاریخ کے ساتھ بھی ایسا ہی ہوا۔ میری نظر میں یہ تجزیہ کرنا فضول ہے کہ یہاں کس نے حکومت کی اور یہاں کون رہتے تھے ، کن کن معاہدے ہوئے ۔ یہ کام صرف وہی مورخ کر سکتے ہیں جو تاریخ کو مختلف انداز سے دیکھتے ہیں۔‘‘
اس موقع پر مرکزی وزیر تعلیم دھرمیندر پردھان اور دیگر معززین موجود تھے ۔