’دہشت گردی کا ایکو سسٹم پوری طرح تباہ کیا جائیگا‘

’وزیر اعظم کی سربراہی میں یو ٹی ترقی کی راہ پر گامزن ہے‘ حالات میں بھی معمول پر آ رہے ہیں‘
جموں//
لیفٹیننٹ گورنر‘ منوج سنہا نے دہشت گردی کے ایکو سسٹم کو ختم کرنے کا عزم دہراتے ہوئے کہا کہ سماج کے ہر طبقے کو اپنی ذمہ داری نبھا کر دہشت گردی کے خلاف جنگ میں شامل ہونا چاہئے ۔
سنہا نے کہاکہ قوم ہمیشہ ان بہادر سپاہیوں کی مقروض رہے گی جنہوں نے اتحاد، سالمیت، امن اور ترقی کے لیے اپنی جانوں کا نذرانہ پیش کیا۔
ان باتوں کا اظہار سنہا نے ریاسی میں تقریب سے خطاب کے دوران کیا۔
ایل جی نے کہا کہ دہشت گردی کے ایکو سسٹم کو ختم کرنے کی خاطر سیکورٹی ایجنسیاں اپنی خدمات خوش اسلوبی کے ساتھ انجام دے رہی ہیں تاہم سماج کے ہر طبقے کو دہشت گردی کے خلاف جنگ میں اپنا بھر پور تعاون فراہم کرنا چاہئے ۔
سنہا نے کہا’’جموںکشمیر میں دہشت گردی کے ماحولیاتی نظام کو پوری طرح سے ختم کرکے مرکزی زیر انتظام علاقے میں بہت جلد دہشت گردی کا صفایا کیا جائے گا‘‘۔
جموںکشمیر کی موجودہ صورتحال پر اپنے خیالات کا اظہار کرتے ہوئے منوج سنہا نے کہاکہ وزیر اعظم نریندر مودی کی رہنمائی میں جموں کشمیر میں حالات یکسر تبدیل ہوئے ہیں۔
ایل جی کے مطابق گزشتہ چار برسوں کے دوران جموںکشمیر میں ہر شعبے نے ترقی کی ہے اور بنیادی ڈھانچے کی ترقی کو مزید تیز تر کرنے ، صنعتوں کیلئے سازگار ماحول بنانے اور معیشت کے مختلف شعبوں میں سرمایہ کاری کو وسعت دینے کی خاطر بھی زمینی سطح پر اقدامات اٹھائے جارہے ہیں۔
سنہا نے کہاکہ وزیر اعظم نریندر مودی کی سربراہی میں جموں وکشمیر اس وقت ترقی کی راہ پر گامزن ہے اور حالات میں بھی معمول پر آ رہے ہیں۔
ایل جی نے کہا’’ ہم نے ایک خوشحال جموں کشمیر یوٹی کا خواب دیکھا تھا اور گزشتہ چار برسوں میں ہم نے بنیادی ڈھانچے کی ترقی کو تیز کرنے ، صنعتوں کے لئے زیادہ سازگار ماحول بنانے اور معیشت کے مختلف شعبوں میں سرمایہ کاری بڑھانے کے لئے بہت سے اَقدامات اُٹھائے ہیں‘‘۔
سنہا نے کہا کہ عوام پر مبنی پالیسیوں ، مختلف شعبوں میں ترقی پسند اِصلاحات اور نوجوانوں ، خواتین ، کسانوں اور پسماندہ طبقات کو بااِختیار بنانے پر حکومت کی خصوصی توجہ نے جموں کشمیر کی تیز رفتار اور جامع ترقی کی راہ ہموار کی ہے۔
لیفٹیننٹ گورنر نے زراعت اور اس سے منسلک شعبوں سے وابستہ کسانوں اوردیگرشراکت داروںپر بھی زور دیا کہ وہ ’’ جامع زرعی ترقیاتی پروگرام (ایچ اے ڈِی پی )‘‘کے تحت فوائد حاصل کریں۔
سنہا نے کہا کہ قوم ہمیشہ اِن بہادر فوجیوں کی مقروض رہے گی جنہوں نے اتحاد،یکجہتی، سا لمیت، اَمن اور ترقی کے لئے اَپنی جانوں کا نذرانہ پیش کیا ہے۔ اُنہوں نے کہا ،’’ ہم نے ان کے خوابوں کے مطابق ترقی پسند اور جدید جموں و کشمیر کی تعمیر کے لئے خلوص اور ایمانداری کے ساتھ کام کیا ہے۔‘‘
اِس موقعہ پر لیفٹیننٹ گورنر نے سنت شری بال یوگیشور داس جی مہاراج کے ساتھ بھگوان نارائن کی مورتی کی نقاب کشائی بھی کی۔
اِس موقعہ پر رُکن قانون ساز اسمبلی کلدیپ راج دوبے ،ضلع ترقیاتی کمشنررِیاسی وشیش پال مہاجن، سول اور پولیس اِنتظامیہ کے سینئر افسران، سابق فوجی جوان، شہدا ٔکے اہل خانہ اور مختلف شعبہ ہائے زندگی سے تعلق رکھنے والے ممتاز شہری موجود تھے۔