دہشت گردوں سے روابط کے الزام میں دو سرکاری ملازمین برطرف

سرینگر/۲۹نومبر
جموں کشمیرحکومت نے ایک ٹیچر اور ایک فارماسسٹ سمیت دو اور ملازمین کو دہشت گردوں سے روابط کے الزام میں ان کی خدمات سے برخاست کردیا ہے۔
اعلیٰ سرکاری ذرائع نے بتایا کہ یہ کارروائی بھارتی آئین کے آرٹیکل 311 کے تحت کی گئی ہے۔
ذرائع نے بتایا کہ ملازمین میں محکمہ صحت اور میڈیکل ایجوکیشن میں فارماسسٹ عبدالرحمٰن نائیکا اور سکول ایجوکیشن ڈپارٹمنٹ کے استاد ظاہر عباس شامل ہیں۔
گزشتہ چند مہینوں میں لیفٹیننٹ گورنر کی زیر قیادت انتظامیہ نے مرکز کے زیر انتظام علاقے میں دہشت گردی سے روابط کے الزام میں کئی سرکاری ملازمین کو ان کی خدمات سے برخاست کیا ہے۔
جموں کشمیر میں گزشتہ ماہ وجود میں آنے والی منتخبہ حکومت کے بعد یہ سرکاری لازمین کو برطرف کرنے کا یہ پہلا معاملہ ہے ۔
پی ڈی پی کی صدر‘محبوبہ مفتی نے حال ہی میں حکومت سے مطالبہ کیا تھا کہ گورنر انتظامیہ کی جانب سے ملازمین کی برطرفی کے معاملات کا از سرنو جائزہ لیا جائے ۔