’ویٹ لینڈز میں داخل ہونے کیلئے اجازت طلب کرنی ہو گی ‘

سرینگر//
محکمہ وائلڈ لائف پروٹیکشن نے چہارشنبہ کے روز عام لوگوں کیلئے ایڈوائزری جاری کی ہے، جس میں ان پر زور دیا گیا ہے کہ وہ کشمیر ویٹ لینڈز میں داخل ہونے سے پہلے حکام سے مناسب اجازت حاصل کریں۔
یہ ایڈوائزری اس وقت سامنے آئی ہے جب دنیا کے مختلف حصوں سے مہاجر پرندے کشمیر ویٹ لینڈز میں پہنچنا شروع ہوگئے ہیں۔
حکام کا کہنا ہے کہ بغیر اجازت ویٹ لینڈز میں داخل ہونے والے کسی بھی شخص کو وائلڈ لائف پروٹیکشن ایکٹ ۱۹۷۲ کی خلاف ورزی سمجھا جائے گا اور قانون کی دفعات کے تحت خلاف ورزی کرنے والے کے خلاف سخت کارروائی کی جائے گی۔
محکمہ وائلڈ لائف پروٹیکشن نے عوام الناس کو مطلع کیا ہے کہ دنیا کے مختلف حصوں سے نقل مکانی کرنے والے پرندے کشمیر کے ویٹ لینڈز میں پہنچنا شروع ہوگئے ہیں۔ یہ پرندے موسم سرما کے مہینوں کے دوران ویٹ لینڈز کے درمیان رہیں گے اور نقل و حرکت کریں گے۔
ایڈوائزری میں کہا گیا ہے ’’ان کی حفاظت اور تحفظ کو یقینی بنانے کے لئے محکمہ وائلڈ لائف پروٹیکشن کو ان مہاجر پرندوں کی حفاظت کی ذمہ داری سونپی گئی ہے۔ بدقسمتی سے، برے ارادوں والے کچھ افراد پرندوں کو نقصان پہنچانے یا ان کی رہائش گاہوں میں خلل ڈالنے کی کوشش کرتے ہیں۔ ایسی سرگرمیوں کو روکنے کیلئے‘ کسی کو بھی پیشگی اجازت کے بغیر ویٹ لینڈمیں جانے کی اجازت نہیں ہوگی‘‘۔
محکمہ وائلڈ لائف نے مزید کہا ہے’’ پرندوں کو دیکھنے میں دلچسپی رکھنے والے افراد کو مناسب اجازت حاصل کرنا ضروری ہے۔اس اقدام سے محکمہ کو جائز وزٹروں کی شناخت کرنے میں مدد ملتی ہے‘‘۔
ایڈوائزری میں کہا گیا ہے کہ اگر کوئی بھی اجازت کے بغیر ویٹ لینڈ میں داخل ہوتا پایا گیا تو اسے وائلڈ لائف پروٹیکشن ایکٹ ۱۹۷۲ کی خلاف ورزی سمجھا جائے گا اور اس ایکٹ کی دفعات کے تحت ان کے خلاف سخت کارروائی کی جائے گی۔
عہدیداروں نے کشمیر میں قیام کے دوران ان مہاجر پرندوں کو محفوظ ماحول فراہم کرنے میں عوام سے تعاون کی درخواست کی۔