ترال میں مشتبہ ملی ٹنٹ حملے میں غیر مقامی مزدور زخمی:پولیس

سرینگر//
جنوبی کشمیر کے ضلع پلوامہ کے ترال علاقے میں جمعرات کی صبح مشتبہ ملی ٹنٹ حملے میں ایک غیر مقامی مزدور زخمی ہو گیا۔
ذرائع نے بتایا’’ترال کے بٹہ گنڈ علاقے میں جمعرات کی صبح مشتبہ ملی ٹنٹ حملے میں شبم کمار ساکن اتر پردیش نامی ایک غیر مقامی مزدور زخمی ہوگیا جس کو ہسپتال پہنچایا گیا جہاں اس کی حالت مستحکم بتائی جا رہی ہے ‘‘۔
ذرائع نے کہا’’غیر مقامی مزدور کے ہاتھ میں گولی لگی ہے ‘‘۔
پولیس نے بتایا کہ وہ اس سلسلے میں تحقیقات کر رہے ہیں لیکن ابھی یہ واضح نہیں ہوا ہے کہ آیا یہ ملی ٹنٹ حملہ ہی تھا۔
ایک پولیس افسر نے بتایا’’زخمی غیر مقامی مزدور کو دوسرے ساتھیوں نے ہسپتال منتقل کیا جہاں اس کی حالت مستحکم بتائی جا رہی ہے ‘‘۔انہوں نے کہا’’مذکورہ غیر مقامی مزدور کیسے زخمی ہوا اس کی تحقیقات کی جا رہی ہے ‘‘۔
واقعہ پیش آنے کے فوراً بعد پولیس کے سینئر افسران اور سیکورٹی فورسز جائے واردات پر پہنچ گئے ۔
بتادیں کہ یہ وادی میں گذشتہ ایک ہفتے کے دوران غیر مقامی مزدوروں پر ہونے والا تیسرا حملہ ہے ۔
گگن گیر سونہ مرگ علاقے میں مشتبہ ملی ٹینٹوں نے اتوار کی شام زڈ مورا ٹنل کے کام پر مامور ملازمین اور غیر مقامی مزدوروں پر اندھا دھند فائرنگ شروع کی اندھا دھند فائرنگ کی جس کے نتیجے میں ڈاکٹرشاہنواز احمد سمیت سات افراد ہلاک جبکہ پانچ دیگر زخمی ہوئے تھے ۔
سیکورٹی فورسز نے بدھ کے روز اس حملے میں ملوث دو مشتبہ غیر ملکی ملی ٹنٹوں کی تصویریں جاری کیں۔