گگن گیرعلاقے میں وسیع پیمانے پر تلاشی آپریشن جاری

سرینگر//
وسطی کشمیر کے ضلع گاندربل کے گگن گیر سونہ مرگ علاقے میں اتوار کی شام مشتبہ ملی ٹینٹوں کے غیر مقامی مزدوروں پر حملے کے بعد علاقے میں حملہ آوروں کی تلاش کے لئے وسیع پیمانے پر تلاشی آپریشن جاری ہے ۔
بتادیں کہ گگن گیر سونہ مرگ علاقے میں مشتبہ ملی ٹینٹوں نے اتوار کی شام زڈ مورا ٹنل کے کام پر مامور ملازمین اور غیر مقامی مزدوروں پر اندھا دھند فائرنگ شروع کی اندھا دھند فائرنگ کی جس کے نتیجے میں ڈاکٹر سمیت سات افراد ہلاک جبکہ پانچ دیگر زخمی ہوئے ہیں۔
واقعے کے فوراً بعد سیکورٹی فورسز نے آس پاس علاقوں کو محاصرے میں لے کر حملہ آوروں کی تلاش کے لئے بڑے پیمانے پر تلاشی آپریشن شروع کر دیا۔
سرکاری ذرائع نے بتایا کہ علاقے میں پیر کو بھی حملہ آوروں کی تلاش کے لئے آپریشن وسیع پیمانے پر جاری ہے ۔انہوں نے کہا کہ علاقے کو پوری طرح سے محاصرے میں لیا گیا ہے اور محاصرے کو مزید سخت کرنے کے لئے فورسز کی مزید کمک طلب کی گئی ہے ۔ان کا کہنا تھا کہ نزدیکی جنگل میں آپریشن چلانے کے لئے ڈرون اور سونگھنے والے کتوں کو بھی کام پر لگا دیا گیا ہے ۔
ذرائع نے بتایا کہ آپریشن کی نگرانی کے لئے سیکورٹی اعلیٰ افسر گاندربل میں خیمہ زن ہیں۔انہوں نے کہا کہ قومی تحقیقاتی ایجنسی( این آئی اے ) کی ایک ٹیم بھی ابتدائی تحقیقات میں مدد کے لئے جائے واردات پر پہنچی ہے ۔
پولیس ذرائع نے بتایا کہ ملی ٹنٹوں نے سرینگر، سونہ مرگ روڈ پر گگن گیر کے نزدیک زڈ مورا ٹنل کی تعمیر کے لئے انفراسٹریکچر کمپنی کی طرف سے لگائے گئے کیمپ پر فائرنگ گی۔
زڈ مورا ٹنل،جو تکمیل کے قریب ہے ، ان دو ٹنلوں میں سے ایک ہے جو لداخ یونین ٹریٹری کو سال بھر باقی دنیا سے جوڑے گی۔فائرنگ کے اس واقعے میں جاں بحق ہونے والوں میں سے دو کا تعلق جموں وکشمیر سے ہے جن میں ایک کشمیری ڈاکٹر شامل ہے ،جبکہ تین بہار کے ہیں،ایک کا تعلق پنجاب سے ہے اور ایک مدھیہ پردیش کا رہنے والا ہے ۔
دریں اثنا جموں و کشمیر کے وزیر اعلیٰ عمر عبداللہ، لیفٹیننٹ گورنر منوج سنہا اور دیگر تمام سیاسی جماعتوں کے لیڈروں نے اس واقعے کی شدید الفاظ میں مذمت کی ہے ۔