حج منزل میں حج 2025 کے عازمین کے کاغذات جمع کرانے کا عمل جاری : کوثر جہاں

نئی دہلی// دہلی اسٹیٹ حج کمیٹی کی چیئرپرسن کوثر جہاں نے دہلی اسٹیٹ حج کمیٹی کی جانب سے حج 2025 کے لیے منتخب عازمین حج کے لیے حج منزل کے دفتر میں میڈیکل سر ٹیفکیٹ جاری کرنے کے لیے لگائے گئے کیمپ کا آج معائنہ کیا اور وہاں موجود تمام عازمین حج سے ملاقات کی اور انہیں مبارکبادپیش کی۔ اس دوران انہوں نے کہا کہ عازمین حج کی سہولت کے لیے ہماری کوششیں مسلسل جاری رہیں گی۔ دہلی اسٹیٹ حج کمیٹی کی طرف سے جاری کردہ ایک پریس ریلیز میں یہ اطلاع دی گئی ۔ اس موقع پر دہلی اسٹیٹ حج کمیٹی کے ایگزیکٹو آفیسر اشفاق احمد عارفی اور ڈپٹی ایگزیکٹو آفیسر محسن علی بھی محترمہ کوثر جہاں کے ہمراہ موجود تھے ۔
ایگزیکٹو آفیسر عارفی نے کہا کہ عازمین حج کو حج منزل میں فراہم کی جانے والی میڈیکل سرٹیفکیٹ کی سہولیات مسلسل جاری ر ہیں گی۔
واضح رہے کہ 2025 کے مقدس حج کے لیے صوبہ دہلی سے کل 2690 عازمین حج کا انتخاب کیا گیا ہے ۔ ان میں سے 2412 کا تعلق عام زمرہ سے ہے جبکہ ایک ساتھی کے ساتھ 65 سال سے زائد عمر کے عازمین حج کی تعداد 252 ہے ۔ اس سال دہلی سے بغیر محرم کے فریضہ حج ادا کرنے کے لیے منتخب 45 سال یا اس سے زیادہ عمر کی خواتین کی تعداد 26 ہے ۔