جموںکشمیر میںاگلی سرکار کانگریس اور نیشنل کانفرنس الائنس کی ہوگی: میر

جموں//
سینئر کانگریس لیڈر ‘غلام احمد میر کا کہنا ہے کہ جموںکشمیر میں اگلی سرکار کانگریس اور نیشنل کانفرنس الائنس کی ہوگی۔
میر نے کہا کہ انتخابات کے تیسرے مرحلے میں بھی لوگ بی جے پی کو ووٹ نہیں دیں گے ۔
کانگریسی لیڈر نے ان باتوں کا اظہار ہفتے کے روز یہاں بشناہ میں نامہ نگاروں کے ساتھ بات کرنے کے دوران کیا۔
میر نے کہا’’جموںکشمیر میں دس برسوں کے بعد اسمبلی الیکشن ہو رہے ہیں ۔پہلے لوگوں کے دلوں کے میں یہی سوال ہے کہ اتنے عرصے کے بعد کیوں الیکشن ہو رہے ہیں‘‘۔
ان کا کہنا تھا’’اس کے بعد ان دس برسوں کے دوران جموںکشمیر کو دو حصوں میں منقسم کرکے یونین ٹریٹری بنا دیا گیا لوگوں کی نوکریاں‘ سٹیٹ سبجیکٹ چھین لئے گئے اور بے روز گاری آسمان چھونے لگی‘‘۔
کانگریسی لیڈر نے کہاکہ بی جے پی نے ترقی کا کوئی کام نہیں کیا صرف پرانے پروجیکٹوں کو ہی نئے نام دئے گئے ۔
میر نے کہاکہ لوگ انتخابات کے پہلے اور دوسرے مرحلے کی طرح تیسرے مرحلے میں بھی بی جے پی کو ووٹ نہیں دیں گے ۔انہوں نے کہا کہ جموں وکشمیر میں کانگریس اور نیشنل کانفرنس الائنس کی سرکار بن جائے گی۔
ان کا کہنا تھا کہ ضرورت پڑنے پر ہم خیال اور اچھے امید واروں کو اپنے ساتھ ملایا جا سکتا ہے ۔