نئی دہلی/۳ستمبر
وزیر اعظم نریندر مودی نے آج امید ظاہر کی ہے کہ ان کے برونائی دارالسلام اور سنگاپور کے دورے سے ہندوستان اور آسیان کے درمیان شراکت داری مزید مضبوط ہوگی۔
مودی آج صبح آسیان کے ان اہم شراکت دار ممالک کے تین روزہ دورے پر روانہ ہوئے ہیں۔ مسٹر مودی مقامی وقت کے مطابق شام۵بجے برونائی پہنچیں گے ۔ ہندوستانی کمیونٹی کے لوگوں کے لئے ایک استقبالیہ پروگرام میں شرکت کے علاوہ وہ ہندوستانی ہائی کمیشن میں نئی چانسری بلڈنگ کا بھی افتتاح کریں گے ۔ وہ رات کو عمر علی سیف الدین مسجد بھی جائیں گے ۔
اپنی روانگی سے قبل ایک بیان میں مودی نے کہا”آج، میں برونائی دارالسلام کا اپنا پہلا دو طرفہ دورہ کر رہا ہوں۔ جیساکہ ہم اپنے سفارتی تعلقات کے 40 سال کا جشن منارہے ہیں، میں اپنے تاریخی تعلقات کو نئی بلندیوں تک لے جانے کے لیے عزت مآب سلطان حاجی حسن البلقیہ اور شاہی خاندان کے دیگر معزز اراکین کے ساتھ ہونے والی ملاقات کا منتظر ہوں“۔
دورے کے دوسرے مرحلے پر وزیر اعظم نے کہا کہ برونائی سے میں 4 ستمبر کو سنگاپور جا¶ں گا۔ میں صدر تھرمن شانموگرٹنم، وزیر اعظم لارنس وونگ، سینئر وزیر لی ہسین لونگ اور ایمریٹس سینئر وزیر گوہ چوک تونگ سے ملاقات کے موقع کا منتظر ہوں۔ میں سنگاپور کی متحرک کاروباری برادری کے رہنما¶ں سے بھی ملاقات کروں گا۔
وزیر اعظم نے کہا”میں سنگاپور کے ساتھ خاص طور پر جدید مینوفیکچرنگ، ڈیجیٹلائزیشن اور پائیدار ترقی کے نئے اور ابھرتے ہوئے شعبوں میں اپنی اسٹریٹجک شراکت داری کو گہرا کرنے کے لیے اپنی بات چیت کا منتظر ہوں۔ مجھے یقین ہے کہ میرے دوروں سے برونائی، سنگاپور اور عظیم آسیان خطے کے ساتھ ہماری شراکت داری کو مزید تقویت ملے گی۔“
