چودھری ذوالفقار علی کی امت شاہ سے ملاقات ‘ بی جے پی میں شمولیت کا امکان

نئی دہلی//
جموں کشمیر اپنی پارٹی کے نائب صدر ‘چودھری ذوالفقار علی نے مرکزی وزیر داخلہ امیت شاہ سے ان قیاس آرائیوں کے درمیان ملاقات کی کہ وہ اگلے ماہ مرکز کے زیر انتظام علاقے میں ہونے والے اسمبلی انتخابات سے قبل بی جے پی میں شامل ہوسکتے ہیں۔
ایڈوکیٹ علی نے۲۰۰۸؍ اور۲۰۱۴ کے اسمبلی انتخابات میں پیپلز ڈیموکریٹک پارٹی (پی ڈی پی) کے ٹکٹ پر راجوری ضلع کے درہال اسمبلی حلقہ سے کامیابی حاصل کی تھی۔ وہ ۲۰۱۵ سے ۲۰۱۸ تک محبوبہ مفتی کی قیادت والی پی ڈی پی،بی جے پی مخلوط حکومت میں کابینی وزیر کے طور پر خدمات انجام دے چکے ہیں۔
جون ۲۰۱۸ میں قومی پارٹی کے حکومت سے الگ ہونے کے بعد مخلوط حکومت گر گئی تھی۔ سابق وزیر الطاف بخاری کی قیادت میں پی ڈی پی کے کئی رہنماؤں نے بعد میں ۲۰۲۰ میں اپنی پارٹی کی بنیاد رکھی اور علی اس کے بانی ممبروں میں سے ایک تھے۔
بی جے پی کے ایک رہنما نے بتایا کہ علی نے دہلی میں وزیر داخلہ سے ملاقات کی اور اسمبلی انتخابات سمیت جموں و کشمیر سے متعلق کئی امور پر تبادلہ خیال کیا۔
ان کاکہنا تھا’’علی نے بی جے پی میں شامل ہونے کی خواہش کا اظہارکیا۔ انتخابات سے قبل ان کی شمولیت پارٹی کے لئے ایک بڑا حوصلہ افزائی ہوگی جو مرکز کے زیر انتظام علاقے میں اپنے بل بوتے پر حکومت بنانے پر نظر یں جمائے ہوئے ہے‘‘۔
الیکشن کمیشن نے جمعہ کو جموں و کشمیر میں تین مرحلوں میں ۱۸ستمبر‘۲۵ ستمبر اور یکم اکتوبر کو اسمبلی انتخابات کا اعلان کیا اور کہا کہ ووٹوں کی گنتی۴؍اکتوبر کو ہوگی۔ (ایجنسیاں)