مودی نے کورونا سے بے سہارا ہوئے بچوں کےلئے پی ایم کیئرز سے امدادی رقم جاری کی

نئی دہلی/۳۰مئی
وزیر اعظم نریندر مودی نے پیر کوان بچوں کےلئے پی ایم کیئرزفنڈ اسکیم کے تحت امدادجاری کی جو کورونا کے دور میں اس انفیکشن کی وجہ سے اپنے والدین یا سرپرستوں کوکھونے کی وجہ سے بے بس ہو گئے ہیں۔
آج اس موقع پر ویڈیو کانفرنس کے ذریعے بچوں سے خطاب کرتے ہوئے وزیر اعظم نے کہا کہ پی ایم کیئرز فار چلڈرن اس بات کا عہد ہے کہ ملک کا ہرشہری انتہائی حساسیت کے ساتھ ان بچوں کے ساتھ ہے ۔ انہوں نے کہا کہ میں مطمئن ہوں کہ ایسے بچوں کی اچھی تعلیم کے لیے ان کے گھروں کے قریب ہی سرکاری یا پرائیویٹ اسکولوں میں ان کا داخلہ کرایاجاچکا ہے ۔
مودی نے کہا کہ اس اسکیم کے تحت اگر کسی بچے کو پروفیشنل کورس یا اعلیٰ تعلیم کے لیے قرض کی ضرورت ہے تو پی ایم کیئرز اس میں بھی مدد کرے گا۔ انہوں نے کہا کہ دوسری روزمرہ ضروریات کےلئے دیگر اسکیموں کے ذریعے ان کےلئے ماہانہ ۴ہزارروپے کا انتظام کیا گیا ہے ۔
وزیراعظم نے کہا کہ جب ایسے بچے اسکول کی تعلیم مکمل کرلیں گے تو مستقبل کے خوابوں کےلئے مزید رقم کی ضرورت ہوگی۔ اس کےلئے۱۸سے۲۳سال کے نوجوانوں کو ہر ماہ وظیفہ ملے گا اور جب بچے ۲۳سال کے ہو جائیں گے تو انہیں دس لاکھ روپے کی یکمشت امداد دی جائے گی۔
مودی نے کہا کہ پی ایم کیئر فار چلڈرن کے ذریعے بچوں کو آیوشمان ہیلتھ کارڈ بھی دیا جا رہا ہے ۔ اس سے انہیں پانچ سال تک مفت علاج کی سہولت بھی ملے گی۔
وزےر اعظم نے کہا کہ ملک پی ایم کیئرز کے ذریعے اس ذمہ داری کو پورا کرنے کی کوشش کر رہا ہے ۔ یہ کوشش کسی ایک شخص تنظیم یا حکومت کی محض کوشش نہیں ہے ، ہمارے کروڑوں ہم وطنوں نے اپنی محنت اور پسینے کی کمائی پی ایم کیئرز میں دی ہے ۔
اس موقع پرمودی نے کہا میں جانتا ہوں کہ کوئی بھی کوشش اور تعاون آپ کے والدین کے پیار کی تلافی نہیں کر سکتا، لیکن آپ کے والد اور والدہ کی غیر موجودگی میں، ماں بھارتی اس بحران کی گھڑی میں آپ سبھی بچوں کے ساتھ ہے ۔ ملک کے جذبات آپ کے ساتھ ہیں اور پورا ملک آپ کے خوابوں کی تکمیل کے لیے آپ کے ساتھ ہے ۔
وزیر اعظم نے کہا کہ پوری انسانیت وباسے متاثر ہوئی ہے ۔ دنیا کا شاید ہی کوئی کونا ہو گا جہاں صدی کے اس سب سے بڑے سانحے نے لوگوں کو کبھی نہ بھلائے جانے والے گاوں نہ دئے ہوں۔ آپ نے جس ہمت اور حوصلے کے ساتھ اس بحران کا مقابلہ کیا اس کےلئے میں آپ سب کو سلیوٹ کرتاہوں۔
مودی نے کہا کہ پی ایم کیئرز نے کورونا کے دوران اسپتال تیارکرنے ، وینٹی لیٹر خریدنے اورآکسیجن پلانٹ لگانے میں بھی بہت مددکی، اس سے کئی جانیں بچائی جا سکیں، اتنے ہی خاندانوں کا مستقبل بچایا جا سکا۔
وزےر اعظم نے کہا کہ مایوسی کے بڑے سے بڑے ماحول میں بھی اگر ہم خود پر یقین رکھیں تو روشنی کی کرن ضرور نظر آتی ہے ، خود ہمارا ملک ہندوستان اس کی سب سے بڑی مثال پیش کرتا ہے ۔
مودی نے اس موقع پر بدعنوانی کی برائی پر بھی حملہ بولا۔ انہوں نے کہا کہ آج جب ہماری حکومت اپنے آٹھ سال مکمل کر رہی ہے ، توملک کا اعتماد، اہل وطن کا خودپربھروسہ بے مثال ہے ۔ انہوں نے کہا بدعنوانی، ہزاروں کروڑ کے گھپلے ، اقرباپروری، ملک بھر میں پھیل رہی دہشت گرد تنظیم، علاقائی تفریق، جیسے کچھ چکروں میں ملک۲۰۱۴سے پہلے پھنسا ہوا تھا، اب اس سے باہرنکل رہا ہے