ریاسی میں پولیس حراست میں ایک شخص کی موت انکوائری کا حکم

کٹرا//
جموں کشمیر کے ریاسی ضلع میں بدھ کے روز حراست میں لیے گئے ایک ۲۵ سالہ شخص کی مبینہ طور پر پولیس اسٹیشن کے اندر پھانسی لگا کر موت ہو گئی۔
عہدیداروں نے بتایا کہ کٹرا کے متھیال گاؤں کے رہنے والے انمول ڈوگرہ کی موت کے بعد اس کے اہل خانہ نے احتجاج شروع کردیا جس کے بعد سب ڈویڑنل مجسٹریٹ پیوش ڈوترا نے تحقیقات کا حکم دیا۔
ڈوگرہ کے والد پورن چند نے کہا کہ ان کے بیٹے کی کٹرا پولیس اسٹیشن کی تحویل میں موت ہو گئی جب اسے پچھلے ہفتے ایک معاملے کے سلسلے میں پوچھ تاچھ کے لئے اٹھایا گیا تھا۔
اس واقعہ کی مجسٹریٹ جانچ کا مطالبہ کرتے ہوئے انہوں نے سوال اٹھایا کہ ان کا بیٹا لاک اپ میں لٹکنے کے لئے رسی کا انتظام کیسے کرنے میں کامیاب رہا۔
عہدیداروں نے بتایا کہ متوفی کی نعش پوسٹ مارٹم کے بعد اس کے اہل خانہ کے حوالے کردی گئی اور متوفی کے رشتہ داروں نے اس کی حراست میں موت کے خلاف احتجاج کرنے کے لئے متھیال کے قریب مرکزی سڑک بند کردی۔
ایس ڈی ایم نے کٹرا کے ایڈیشنل سپرنٹنڈنٹ آف پولیس کے ساتھ مل کر مظاہرین سے ملاقات کی اور انہیں منتشر ہونے کے لئے قائل کیا اور انہیں یقین دلایا کہ ڈوگرہ کی موت کے سلسلے میں تحقیقات جاری ہے۔ (ایجنسیاں)