لولاب میں فورسز اور ملی ٹینٹوں کے مابین گولیوں کا تبادلہ

سرینگر//
شمالی ضلع کپواڑہ کے ترمولہ ٹاپ کے نزدیک سیکورٹی فورسز اور ملی ٹینٹوں کے مابین گولیوں کا تبادلہ ہوا جس کے بعد سیکورٹی فورسز نے ایک وسیع العریض علاقے کو محاصرے میں لے لیا ہے ۔
اطلاعات کے مطابق منگل کی شام لولاب کے ترمولہ ٹاپ کے نزدیک سیکورٹی فورسز اور ملی ٹینٹوں کے درمیان شدید گولیوں کا تبادلہ ہوا جس کے بعد فورسز نے علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔
ذرائع نے بتایا کہ اضافی کمک کو جنگلی علاقے کی اور روانہ کیا گیا ہے تاکہ ملی ٹینٹوں کو فرار ہونے کا کوئی موقع فراہم نہ ہو سکے ۔
پولیس کے ایک ترجمان نے ایکس پر جانکاری فراہم کرتے ہوئے بتایا کہ لولاب کے ترمولہ ٹاپ کے نزدیک گولیوں کا تبادلہ ہوا ہے ۔انہوں نے کہاکہ فائرنگ کے بعد علاقے میں تلاشی آپریشن جاری ہے ۔
دریں اثنا پونچھ کے کرشنا گھاٹی سیکٹر میں دراندازی کی کوشش کو ناکام بنانے کے دوران ملی ٹینٹوں اور فورسز کے مابین شدید گولیوں کا تبادلہ ہوا جس دوران ایک جوان شدید طورپر زخمی ہوا اور بعد ازاں وہ زندگی کی جنگ ہار گیا ۔
اطلاعات کے مطابق پونچھ کے کرشنا گھاٹی بتل سیکٹر میں منگل کی صبح فوج نے دراندازی کی کوشش کو ناکام بنایا ۔
ذرائع نے بتایا کہ ایل او سی کے نزدیک سیکورٹی فورسز اور ملی ٹینٹوں کے مابین کافی دیر تک دوبدو گولیوں کا تبادلہ جاری رہا جس کے نتیجے میں ایک جوان زخمی ہوا ۔
معلوم ہوا ہے کہ زخمی فوجی جوان کو علاج ومعالجہ کی خاطر نزدیکی ہسپتال منتقل کیا گیا جہاں پر وہ جانبر نہ ہو سکا۔
باوثوق ذرائع کے مطابق سیکورٹی فورسز نے ایک وسیع العریض جنگلی علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔
دریں اثنا فوج کا کہنا ہے کہ جموں و کشمیر کے ضلع پونچھ کے بٹل سیکٹر میں منگل کی علی الصبح مستعد فوجی جوانوں نے در اندازی کی ایک کوشش کو ناکام بنا دیا تاہم اس دوران ایک فوجی جوان زخمی ہوا۔
فوج کی شمالی کمان نے’ایکس‘پر ایک پوسٹ کے ذریعے جانکاری فراہم کرتے ہوئے کہا’’الرٹ فوجی جوانوں نے بٹل سیکٹر میں منگل کی علی الصبح۳بجے در اندازی کرنے والے دہشت گردوں کو فائرنگ کے ساتھ مصروف رکھ کر ان کی طرف سے کی جانے والی در اندازی کی کوشش کو ناکام بنا دیا‘‘۔
پوسٹ میں کہا گیاکہ طرفین میں بھاری فائرنگ کے تبادلے کے دوران ایک فوجی جوان زخمی ہوا۔پوسٹ میں مزید کہا گیا کہ علاقے میں آپریشن ہنوز جاری ہے ۔