جموں کشمیر میں۲۶جولائی تک موسم گرم رہنے کا امکان

سرینگر//
محکمہ موسمیات کی پیش گوئی کے مطابق جموں وکشمیر میں۲۶جولائی تک موسم گرم رہنے کا امکان ہے ۔
موسمیات محکمے کے ایک ترجمان نے بتایا کہ۲۰جولائی سے۲۶جولائی تک کشمیر میں کہیں کہیں گرج چمک کے ساتھ ہلکی بارشیں ہوسکتی ہیں جبکہ اس دوران جموں خطے کے بیشتر مقامات پر بارشوں کا امکان ہے ۔
ترجمان نے کہا کہ بعد ازاں۲۷سے۳۱جولائی تک جموں وکشمیر میں گرج چمک کے ساتھ رک رک کر بارشیں متوقع ہیں۔
محکمے نے اپنی ایڈوائزری میں کہا کہ اس دوران جموں خطے کے خطرناک مقامات پر مٹی کے تودے ، چٹانیں کھسک آنے کے بھی امکانات ہیں۔
ترجمان نے کہا کہ جموں وکشمیر میں۲۶جولائی تک گرم موسم کا سلسلہ جاری رہ سکتا ہے ۔
قابل ذکر ہے وادی کشمیر میں بھی شدید گرمی نے لوگوں کو بے حال کر کے رکھ دیا۔
شدید گرمی سے بچنے کیلئے جہاں لوگوں کی اکثریت پہاڑی علاقوں میں واقع سیاحتی مقامات کا رخ کر رہی ہے وہیں بچے گرمی سے راحت حاصل کرنے کیلئے ندی نالوں میں دن بھر نہاتے رہتے ہیں۔