راج ناتھ نے فوجی سربراہ سے جھڑپ کی معلومات حاصل کیں

نئی دہلی//
وزیر دفاع‘ راج ناتھ سنگھ نے منگل کی صبح آرمی چیف جنرل اوپیندر دویدی سے بات کی اور جموں و کشمیر کے ڈوڈہ میں دہشت گردوں کے ساتھ فوجی جوانوں کے تصادم کے بارے میں معلومات حاصل کیں۔
پیر کی شام شروع ہوئے انکاؤنٹر میں ایک افسر سمیت پانچ فوجی اہلکار شدید طور پر زخمی ہو گئے ۔ ان میں سے ایک افسر سمیت چار فوجیوں نے بعد میں دم توڑ دیا۔
وزیر دفاع کے دفتر نے آج صبح کہا کہ سنگھ نے جنرل دویدی سے بات کی ہے ۔
آرمی چیف نے وزیر دفاع کو زمینی صورتحال اور تصادم کے بارے میں آگاہ کیا۔ انہوں نے سنگھ کو ریاست میں چلائی جارہی انسداد دہشت گردی کی کارروائیوں کے بارے میں بھی بتایا۔
واضح رہے کہ گزشتہ چند دنوں میں فوج کے دہشت گردوں کے ساتھ کئی انکاؤنٹر ہو ئے ہیں۔ ان میں کئی دہشت گرد مارے جا چکے ہیں لیکن اچھی خاصی تعداد میں فوجی بھی شہید ہو رہے ہیں۔
اس بیچ وزیر دفاع نے ڈوڈہ تصام میں چار فوجیوں کی شہادت پر گہرے رنج و غم کا اظہار کیا ہے ۔
سنگھ نے منگل کو سوشل میڈیا پر ایک پوسٹ میں کہا ’’ڈوڈہ میں انسداد دہشت گردی آپریشن کے دوران فوج کے چار بہادر جوانوں کی ہلاکت سے بہت دکھ ہوا ہے ۔ سوگوار خاندانوں سے میری دلی تعزیت۔ ملک فرض کی راہ پر قربانی دینے والے ان فوجیوں کے خاندانوں کے ساتھ مضبوطی کے ساتھ کھڑا ہے۔انسداد دہشت گردی کی کارروائیاں جاری ہیں اور ہمارے فوجی دہشت گردی کے خاتمے اور خطے میں امن و امان برقرار رکھنے کے لیے پرعزم ہیں۔‘‘