بابر اعظم کو بڑے چانسز دیے، اب ایک ہی دفعہ سرجری کریں، شاہد آفریدی

کراچی //
پاکستان کرکٹ ٹیم کے سابق کپتان شاہد آفریدی نے کہا ہے کہ میرے خیال میں بابر اعظم کو بڑے چانسز دیے اب جو بھی سرجری کرنی ہے وہ ایک ہی دفعہ کریں اور جسے بھی لے کر آرہے ہیں اسے پورا ٹائم دیں۔
شاہد آفریدی اس وقت ورلڈ چیمپئن شپ آف لیجنڈز کیلئے انگلینڈ میں موجود ہیں، وہاں انہوں نے صحافیوں سے گفتگو کرتے ہوئے کہا کہ اتنا کھلا چانس کسی کو نہیں ملا جتنا کپتان بابر اعظم کو ملا ہے، ورنہ جیسے ہی ورلڈ کپ ختم ہوتا ہے سب سے پہلے کپتان کے اوپر چھری پھیری جاتی ہے۔
شاہد آفریدی نے کہا کہ بابر اعظم نے تو دو تین ورلڈ کپ سمیت دو تین ایشیا کپ کھیلے جہاں اسے کافی زبردست موقع ملا۔
انہوں نے کہا کہ ہم نے بھی کپتانی کی ہے جیسے کہ یونس خان ہے، مصباح الحق ہے مگر کافی عرصہ ہوگیا بابر کو کافی چانس مل گئے لہٰذا اب ایک ہی دفعہ سرجری کریں اور جس کو بھی لے کر آرہے ہیں اسے پورا ٹائم دیں۔
پاکستان کرکٹ ٹیم کی سلیکشن کمیٹی کے رکن وہاب ریاض اور عبد الرزاق کو سبکدوش کیے جانے پر شاہد آفریدی کا کہنا تھا کہ ایمانداری کی بات ہے یہ والی سرجری مجھے سمجھ میں نہیں آئی۔