تو صاحب اپنے وزیر اعظم … وزیر اعظم مودی جی کاکہنا ہے کہ ۴ جون کو لوگ … بھارت دیش کے لوگ اپوزیشن پارٹی کے اتحاد’انڈیا بلاک‘ کی قیادت کو بیدار کریں گے اور… اور یوں وہ سپنے دیکھنا بند کر دے گی… دن میں سپنے ۔جناب وزیر اعظم صاحب کایہ بھی فرمانا ہے کہ انہوں نے دن میں خواب دیکھنے کی بات صرف سنی تھی… لیکن انہوں نے پہلی بار دیکھا ہے…’انڈیا بلاک‘ کی قیادت کو دن میں خواب دیکھتے ہو ئے دیکھا ہے ۔اب صاحب دن میں تو ہم بھی خواب دیکھتے ہیں اور ہمیں یقین ہے کہ آپ کو بھی اگر دن میں کبھی میٹھی نیند آتی ہو گی تو آپ بھی خواب دیکھتے ہوں گے … اللہ میاں کی قسم ہم یہ حلفاً بیان کرنے کیلئے تیار ہیں کہ خود وزیر اعظم صاحب بھی دن میں خواب دیکھتے ہو ں گے جب بھی کبھی انہیں دن میں نیند آٹی ہو گی یا سونے کا موقع مل جاتا ہو ہو گا… اور یہ بھی سچ ہے کہ … کہ دن میں خواب دیکھنے میں حرج ہی کیا ہے… برا ہی کیا ہے ۔خیر اس پر… دن میں خواب دیکھنے پر بات پھر کبھی کہ … کہ آج بات وزیر اعظم کی اس بات پر ہو گی کہ … کہ ۴ جون کو لوگ’ انڈیا بلاک‘ کی قیادت کو بیدار کریں گے… نیند سے جگائیں گے… ہمیں بھی یقین ہے کہ ایسا ہی ہو گا… اور ایسا اس لئے ہوگا کہ… کہ سیاستدانوں کو… اپوزیشن کے سیاستدانوں کو نیند سے بیدار کرنے والے لوگ‘ انہیں جگانے والے لوگ …خود سوئے ہیں… گہری نیند سوئے ہیں … کئی برسوں سے سوئے ہیں اور… اور یہ اٹھنے کا نام بھی نہیں لے رہے ہیں… گرچہ انہیں جگانے کی کوشش بھی کی جا رہی ہے… انہیں بیدار کرنے کی سعی بھی ہو رہی ہے… اور … اور اللہ میاں قسم بار بار ہو رہی ہے… لیکن پھر بھی یہ بیدار نہیں ہو رہے ہیں… نیند سے جاگ نہیں رہے ہیں… اگر یہ جاگ جائیں گے…نیند سے بیدار ہو جائیں گے تو… تو صاحب یقین کیجئے کہ پھر …اپوزیشن نہیں ‘ انڈیا بلاک کی قیادت نہیں بلکہ اور کوئی انتخابی نتائج کے دن جاگ جائے گا … پھر کسی اور کو جاگ جانے کی ضرورت پڑے گی… انڈیا بلاک کی قیادت کو نہیں… بالکل بھی نہیں … لیکن صاحب مسئلہ یہ ہے کہ انہیں جو جگائیں گے… وہ خود سوئے ہیں …گہری نہیں ‘ بلکہ بہت گہری نیند سوئے ہیں ۔ ہے نا ؟