الیکشن اچھے ہیں… جی ہاں ہم سچ کہہ رہے ہیں کہ الیکشن اچھے ہیں… اس لئے اچھے نہیں ہیں کہ آپ اپنی پسند کی حکومت کو چن سکتے ہیں… نہیں صاحب اس لئے نہیں… بلکہ اس لئے الیکشن اچھے ہیں کہ …الیکشن پاور دیتا ہے… اجی حکومت والا پاور اور اختیار نہیں بلکہ بجلی والا پاور… وہ کیا ہے کہ سرینگر میںاچانک بجلی سپلائی میں بہتری آئی ہے… اتنی بہتری ہم نے آج سے پہلے کبھی نہیں دیکھی ہے… اس کا ہم پہلی بار مشاہدہ کررہے ہیں… اس سے پہلے بار ہم لطف اندوز ہو رہے ہیں… پہلی بار ہم دیکھ رہے ہیں کہ۷x۲۴ بجلی کی فراہمی کا کیا مطلب ہو تا ہے… کہ … کہ گزشتہ ایک ہفتے سے بجلی جانے کا نام نہیں لے رہی ہے… وہ بجلی جو صرف ایک ہفتے پہلے آنے کا نام نہیں لے رہی تھی… اور ہر تین گھنٹوں کے بعد تین گھنٹوں کیلئے کسی اور کے ساجن کی سہیلی بن جاتی تھی… اب اچانک اتنی وفادار ہو گئی ہے … ہماری وفادار ہو گئی ہے کہ…کہ اللہ میاں کی قسم پہلے پہل ہماری سمجھ میں کچھ نہیں آیا کہ …کہ یہ ہمارے ساتھ ‘ شہر سرینگر کے ساتھ کیا ہو رہا ہے کہ ہمیں اتنی بجلی کی عادت بھی تو نہیں ہے… بھلا ہو ہمارے ایک دوست کا جس نے ہماری اس الجھن کو سلجھا دیا … یہ کہتے ہو ئے سلجھا دیا کہ… کہ بجلی… سرینگر میں ۷x۲۴ بجلی اس لئے دستیاب ہے کیونکہ آئندہ کچھ ایک دنوں میں یہاں… سرینگر کے پارلیمانی حلقے میں الیکشن ہو نے والے ہیں… ووٹنگ ہو نے والی ہے… اب ہم یہ تو نہیں جانتے ہیں… بالکل بھی نہیں جانتے ہیں کہ ہمارے اس دوست کی اس بات میں کتنی حقیقت ہے… لیکن… لیکن یہ حقیقت ہے کہ شہر میں ایک ہفتے سے بجلی سپلائی میں ایک سو نہیں بلکہ ایک ہزار فیصد بہتری آئی ہے… اچانک سے کے پی ڈی سی ایل نے بجلی کی پیداوار میں کمی کا رونا ،رونا بند کردیا ہے… رام بن علاقے میں حالیہ بارشوں سے بجلی ٹاوروں کو ہوئے نقصان کی بھی کوئی بات نہیں کررہا ہے… سچ تو یہ ہے کہ کوئی بات ہی نہیں کررہا ہے… یہ بات کہ آخر یہ بجلی آئی کہاں سے جو ہمیں فراہم کی جا رہی ہے… اور اگر یہ بات سچ ہے کہ بجلی کی فراہمی کا تعلق الیکشن سے ہے تو… تو صاحب پھر ہم ضرور کہیں گے کہ… کہ الیکشن اچھے ہیں ۔ ہے نا؟
