حج۲۰۲۴:سرینگر ہوائی اڈے سے عازمین کا پہلا قافلہ سفر محمود پر روانہ

سرینگر//
جموںکشمیر سے حج ۲۰۲۴کیلئے آج سرینگر بین الاقوامی ہوائی اڈے سے دو الگ الگ پروازوں کے ذریعے ۶۴۴عازمین پر مشتمل پہلا قافلہ سعودی عرب روانہ ہوا۔
یو این آئی نامہ نگار کے مطابق بمنہ حج ہاؤس میں کافی چہل پہل اور جوش و خروش دیکھا جارہا ہے جہاں جمعرات کی صبح سے ہی عازمین حج نعروں کی گونج میں اپنے احباب و اقارب کی معیت میں جمع ہو رہے تھے ۔
نامہ نگار نے بتایا کہ کئی گھنٹوں تک حج ہاؤس میں قیام کے بعد عازمین کو ٹی آر سی کی خصوصی گاڑیوں کے ذریعے سرینگر بین الاقوامی ہوائی اڈے کی طرف روانہ کیا گیا۔
حکام کے مطابق سری نگر ہوائی اڈے سے جمعرات کو ۳۲۲عازمین پر پہلی پرواز جبکہ اتنے ہی عازمین پر مشتمل دوسری پرواز کو بعد دوپہر روانہ کیا گیا۔
ائیر پورٹ حکام کا کہنا ہے کہ ہوائی اڈے پر عازمین کو حج کوانٹر گیٹ سے ہوائی جہاز تک پہنچانے کے لئے ایک الگ علاقہ مختص کیا گیا ہے اور اس کے علاوہ احرام پہننے کیلئے عازمین کے لئے الگ الگ جگہیں رکھی گئی ہیں۔
ان کا کہنا تھا کہ عازمین کے آرام دہ اور احسن سفر کو یقینی بنانے کے لئے خصوصی انتظامات کئے گئے ہیں۔
حکام نے بتایا کہ عازمین کے سامان کی چیکنگ کے لئے حج ہاوس بمنہ میں خصوصی کاونٹر قائم کئے گئے ہیں۔ ان کے مطابق عازمین کو اے سی گاڑیوں میں ہوائی اڈے تک پہنچایا گیا ۔
اس دوران صوبائی کمشنر کشمیروِجے کمار بِدھوری نے آئی جی پی کشمیر وِی کے بِردی کے ہمراہ سری نگر بین الاقوامی ہوائی اڈے سے جموںوکشمیر یوٹی کا عازمین حج ۲۰۲۴ء کے پہلے قافلے کی روانگی کے اِنتظامات کا جائزہ لیا۔
اِس موقعہ پر صوبائی کمشنر کشمیر نے عازمین حج سے بات چیت کی اور اُنہیں اَپنی مبارک باد اور نیک خواہشات کا اِظہار کیا۔
صوبائی کمشنرکشمیر نے دورے کے دوران ہوائی اڈے کے احاطے کے اندر اور باہر پینے کے صاف پانی کی دستیابی، طبی سہولیات، ریفریشمنٹ، رضاکارانہ خدمات اور ٹریفک مینجمنٹ کے علاوہ امیگریشن چیک کی سہولیات اور سامان لے جانے کی سہولیات کا بھی جائزہ لیا۔
بدھوری نے متعلقہ اَفسران کو ہدایت دی کہ روانگی کے شیڈول کے اِختتام تک تمام عازمین کی بغیر کسی پریشانی روانگی کو یقینی بنایا جائے۔
اِس برس جموں و کشمیر یوٹی کے کل۷۰۰۸ عازمین سفر محمود پر جائیں گے۔
عازمین اَپنے پیاروں کو الوداع کہتے ہوئے معمولی سفید لباس پہن کر سری نگر کے ہوائی اڈے پر جمع ہوئے۔