لوک سبھا الیکشن:پانچویں مرحلے میں۶۹۵؍امیدواروں کی قسمت کا فیصلہ ہوگا

نئی دہلی///
آئندہ۲۰مئی کو لوک سبھا انتخابات کے پانچویں مرحلے کیلئے آٹھ ریاستوں اور مرکز کے زیر انتظام علاقوں سے۶۹۵؍امیدوار میدان میں ہوں گے ۔
الیکشن کمیشن نے بدھ کو کہا کہ پانچویں مرحلے میں اتر پردیش کی۱۴‘ مہاراشٹر کی۱۳‘ مغربی بنگال کی سات، بہار اور اڈیشہ کی پانچ، پانچ، جھارکھنڈ کی تین اور جموں کشمیر اور لداخ کی ایک ایک سیٹ پر انتخابات ہوں گے ۔
اس مرحلے کیلئے۱۵۸۶؍کاغذات نامزدگی داخل کیے گئے ہیں ۔۳مئی کو کاغذات نامزدگی داخل کرنے کی آخری تاریخ تھی اور کاغذات نامزدگی کی جانچ پڑتال کے بعد۷۴۹کاغذات نامزدگی درست پائے گئے ۔ نام واپس لینے کے بعد اب کل۶۹۵؍امیدوار میدان میں ہیں۔
الیکشن کمیشن کے مطابق مہاراشٹر کی ۱۳ نشستوں کیلئے سب سے زیادہ۵۱۲کاغذات نامزدگی داخل کیے گئے ۔ اس کے بعد اتر پردیش کی۱۴سیٹوں کے لیے ۴۶۶کاغذات نامزدگی داخل کیے گئے ۔ جھارکھنڈ کی چترا پارلیمانی سیٹ کے لیے سب سے زیادہ۶۹نامزدگیاں داخل کی گئیں۔ دوسرے نمبر پر اتر پردیش کی لکھنو سیٹ کے لیے سب سے زیادہ۶۷کاغذات نامزدگی داخل کیے گئے ۔ پانچویں مرحلے میں ایک سیٹ کے لیے اوسطاً ۱۴؍امیدوار میدان میں ہیں۔