سرینگر//
شمالی ضلع کپواڑہ کے لولاب علاقے میں منگل کی صبح نالہ سے معمر شہری کی لاش برآمد کی گئی ہے ۔
اطلاعات کے مطابق گزشتہ شام۸۵سالہ غلام محی الدین گنائی ساکن کانٹھ پورہ لولاب پر اسرار طور پر لاپتہ ہو گیا۔
معلوم ہوا ہے کہ بسیار تلاش کے باوجود بھی معمر شہری کا کئی پراتہ پتہ نہیں چل سکا جس کے بعد اہل خانہ نے گمشدگی کی رپورٹ درج کی۔
ذرائع نے بتایا کہ منگل کی صبح شمریال لولاب میں معمرشہری کی لاش برآمد کی گئی۔
پولیس نے لاش کوتحویل میں لے کر قانونی اور طبی لوازمات پورے کرنے کے بعد میت وارثین کے حوالے کی۔
اس دوران جموں صوبے میں شدید بارش کے بعد آبی ذخائر میں گرنے سے مختلف واقعات میں چار افراد ڈوب گئے اور ایک کی موت کا خدشہ ہے۔
عہدیداروں نے بتایا کہ محمد شفیع (۶۵) اور ممیرا بانو (۱۷) ریاسی میں دیول اور ڈونگا ندیوں کو عبور کرتے ہوئے حادثاتی طور پر تیزی سے بہنے والے پانی میں گر گئے۔ شفیع کی نعش ندی سے نکال لی گئی ہے، اور بانو کو تلاش کرنے کی کوشش کی جا رہی ہے جو گاؤں میں ایک شادی کی تقریب میں شرکت کے لئے گول سے آئی تھی۔
عہدیداروں نے بتایا کہ بارش کی وجہ سے ۲۷۰ کلومیٹر طویل جموں سرینگر قومی شاہراہ پر رام بن اور بنیہال کے درمیان متعدد مقامات پر لینڈ سلائیڈنگ ہوئی جو دوسرے دن بھی گاڑیوں کی آمدورفت کے لئے بند رہی۔