سرینگر لوگ سبھا سیٹ کیلئے اپنی پارٹی کی حمایت کریں گے:جبار

سرینگر//
جموںکشمیر یونائیٹڈ مومنٹ کے چیئرمین اور سابق رکن اسمبلی شیخ اشفاق جبار نے سرینگر لوک سبھا کیلئے جموں وکشمیر اپنی پارٹی کو حمایت دینے کا اعلان کیا ہے
جبار نے کہا کہ ہمیں جموںکشمیر کو در پیش چیلنجوں کا مقابلہ کرنے کیلئے ایک ساتھ لڑنے کی ضرورت ہے ۔
سابق رکن اسمبلی نے یہ اعلان پیر کے روز یہاں ایک پریس کانفرنس کے دوران کیا۔
اس موقع پر جموں کشمیر اپنی پارٹی کے سینئر نائب صدر غلام حسن میر بھی موجود تھے ۔
جبار نے کہا’’میں نے پارٹی کے ساتھیوں کے ساتھ مشاورت کے بعد یہ فیصلہ لیا ہے کہ ہم سرینگر لوک سبھا سیٹ کیلئے جموں وکشمیر اپنی پارٹی کے امید وار اشرف میر کو حمایت کریں گے ‘‘۔
سابق رکن اسمبلی کا کہنا تھا’’میں خود بھی امید وار تھا لیکن جب ہمیں لگا کہ اس طرح ووٹ تقسیم ہوگا اور ایک ایسا امید وار کامیاب ہوگا جو جموںکشمیر کے لوگوں کے توقعات پر پورا نہیں اترے گا تو ہم نے اپنی پارٹی کو حمایت دینے کا فیصلہ لیا‘‘۔
جبار نے کہا کہ ہم اپنی پارٹی کے امید وار کو بھر پور تعاون فراہم کریں گے ۔انہوں نے کہا’’جن طاقتوں نے ۷۰برسوں سے ہمارے جذبات کے ساتھ کھلواڑ کیا، ہمارے سامنے جو چلینجز ہیں، ان کو حل کرنے کیلئے ہمیں مشترکہ طور پر دلی کے ساتھ رابطہ کرنا ہے‘‘۔
سابق رکن اسمبلی کا کہنا تھا’’ہمارے نوجوان بند ہیں، بجلی بحران ہے ، بے روزگاری ہے ، ہمیں اپنی شناخت، ریاستی درجہ بحال کرنا ہے ، اس لئے وسیع تر مفادات کے پیش نظر ہم اپنی پارٹی کو سپورٹ کریں گے۔‘‘