اپنے والد کیلئے بارہمولہ میں انتخابی مہم چلائیں گے

سرینگر/
نیشنل کانفرنس کے نائب صدر عمر عبداللہ کے بیٹوں ظاہر اور ضمیر نے جمعرات کو کہا کہ وہ اپنے والد کے لئے انتخابی مہم چلائیں گے جو شمالی کشمیر کے بارہمولہ پارلیمانی حلقہ سے انتخاب لڑ رہے ہیں۔
دونوں بیٹوں کو وادی کے طول و عرض میں اپنے والد کے ساتھ پارٹی کے انتخابی جلسوں میں شرکت کرتے ہوئے دیکھا گیا ہے۔
یہ پوچھے جانے پر کہ کیا دونوں بھائی اپنے والد کے لیے انتخابی مہم چلائیں گے، ظاہر نے نامہ نگاروں کو بتایا ’’انشاء اللہ ہم دونوں جا کر انتخابی مہم چلائیں گے‘‘۔
دونوں اپنے والد کے ساتھ ڈپٹی کمشنر کے دفتر گئے جہاں پارٹی امیدوار آغا سید روح اللہ مہدی نے سرینگر لوک سبھا حلقہ سے کاغذات نامزدگی جمع کرائے۔
تاہم ظاہر نے ایک اور سوال کا جواب دینے سے انکار کرتے ہوئے کہا کہ انہیں لوگوں سے ملنا ہے۔’’میں لوگوں سے ملنا چاہتا ہوں۔ آپ عمر صاحب کا بائٹ لے لیں‘‘۔انہوں نے میڈیا کے نمائندوں سے کہا۔
ان کے بھائی ضمیر نے کہا کہ اگرچہ ان کا سیاست میں آنے کا کوئی ارادہ نہیں ہے لیکن پھر بھی وہ عوام کے ساتھ جڑے رہنا چاہتے ہیں۔
ضمیر نے کہا ؔ’’میرے پاس ابھی تک کوئی منصوبہ نہیں ہے۔میں ایک وکیل ہوں‘‘۔جب ان سے پوچھا گیا کہ کیا ان کا سیاست میں شامل ہونے کا کوئی ارادہ ہے تو انہوں نے کہا کہ ہمارا لوگوں سے تعلق ہے اور یہ ہمیشہ رہے گا۔ضمیر نے کہا کہ دونوں ہمیشہ عوام سے جڑے رہیں گے۔
ان کاکہنا تھا’’میرے پاس ابھی اس سے زیادہ کوئی منصوبہ نہیں ہے۔ میں عمر کے ساتھ ہوں۔ مہدی نے آج کاغذات نامزدگی جمع کرائے۔ میں اس کے ساتھ ہوں۔ انہیں آخر تک میری حمایت حاصل ہے۔ ہمارا کام لوگوں سے جڑنا ہے۔‘‘