۲۱اور۲۲مارچ کو برفباری کے ساتھ تیز ہوائیں چلنے کا امکان:محکمہ موسمیات

سرینگر//
محکمہ موسمیات کی پیش گوئی کے مطابق وادی کشمیر میں۲۱؍اور۲۲مارچ کو برف و باراں کے ساتھ میدانی علاقوں میں تیز ہوائیں چلنے کا امکان ہے ۔
ترجمان نے کہا کہ بعد ازاں۲۳مارچ کو موسم خشک رہنے کے بعد۲۴؍اور۲۵مارچ کو موسم ایک بار پھر خراب ہونے کی توقع ہے ۔انہوںنے کہا کہ وادی میں۲۰مارچ تک موسم مجموعی طور پر خشک رہنے کا امکان ہے ۔
محکمہ کے ترجمان نے کہا کہ اس کے بعد ۲۱؍اور۲۲مارچ کو موسم ابر آلود رہنے کے ساتھ بیشتر مقامات پر ہلکی بارش یا برف باری ہوسکتی ہے اور اس دوران میدانی علاقوں میں تیز ہوائیں چلنے کا امکان ہے ۔
ان کا کہنا تھا کہ وادی میں۲۳مارچ کو موسم خشک رہ سکتا ہے جبکہ۲۴؍اور۲۵کو ایک بار پھر کہیں کہیں ہلکی بارشوں یا برف باری کا امکان ہے ۔
دریں اثنا وادی کے شبانہ درجہ حرارت میں بتدریج اضافہ درج ہو رہا ہے ۔
سرینگر میں کم سے کم درجہ حرارت۵ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۰ء۲ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۵ء۰ڈگری سینٹی گریڈ ریکارد کیا گیا جہاں گذشتہ شب کا درجہ حرارت منفی۰ء۲ڈگری سینٹی گریڈ ریکارڈ ہوا تھا۔ایک اورسیاحتی مقام پہلگام میں کم سے کم درجہ حرارت منفی۳ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۷ء۱ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت۳ء۱ ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۵ء۰ڈگری سینٹی گریڈ ریکارڈ ہوا تھا۔
قصبہ قاضی گنڈ میں کم سے کم درجہ حرارت۸ء۲ ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۱ء۲ڈگری سینٹی گریڈ ریکارڈ ہوا تھا۔
ادھر وادی میں پیر کی صبح سے ہی دھوپ کھلی رہی جس سے جہاں لوگوں کو مختلف مقامات پر بیٹھے لطف اندوز ہوتے ہوئے دیکھا گیا وہیں کسان بھی اپنے اپنے باغوں اور کھیت کھلیانوں میں مختلف کاموں کے ساتھ مصروف نظر آئے ۔