چینی ایل اے سی کے قریب فوجی صلاحیت میں اضافہ کر رہے ہیں:فوج

گوہاٹی//
مشرقی کمان کے جنرل آفیسر کمانڈنگ اِن چیف ‘ پیر کو لیفٹیننٹ جنرل آر پی کلیتا ‘نے کہا کہ چینی فوج بنیادی ڈھانچے کے لحاظ سے صلاحیتوں میں اضافہ کر رہی ہے، اور اصل کنٹرول لائن (ایل اے سی) کے قریب آپریشنل صلاحیت میں بڑے پیمانے پر اضافہ کر رہی ہے۔
یہاں میڈیا کے نمائندوں کو بریفنگ دیتے ہوئے، لیفٹیننٹ جنرل کلیتا نے کہا، ’’ہم ایل اے سی کے قریب بنائے گئے سرحدی دیہاتوں کے بارے میں بات کرتے ہیں جن کے دوہری استعمال کا امکان ہے۔ اگر ہم سب کچھ ایک ساتھ رکھیں تو یہ کہنا کافی ہوگا کہ پی ایل اے صلاحیت میں اضافہ کر رہی ہے چاہے بنیادی ڈھانچے میں ہو، یا آپریشنل صلاحیت بڑے پیمانے پر‘‘۔
فوجی کمانڈر نے اس بات پر زور دیا کہ ہندوستان کسی بھی ہنگامی صورتحال سے نمٹنے کے لیے بنیادی ڈھانچے اور آپریشنل صلاحیتوں کو بڑھانے کے لیے کام کر رہا ہے۔
ان کاکہنا تھا’’ہماری تمام ایجنسیاں بشمول مسلح افواج اس صورتحال پر مسلسل نظر رکھے ہوئے ہیں۔ ہم اپنی صلاحیتوں کو بھی اپ گریڈ کر رہے ہیں چاہے انفراسٹرکچر کے لحاظ سے ہو یا آپریشنل صلاحیتوں کے لحاظ سے۔ اگر ہم مشرقی تھیٹر میں ایل اے سی کے بارے میں بات کریں تو تبت میں ایل اے سی کے اس پار انفراسٹرکچر میں بہت ترقی ہوئی ہے جو ہو رہی ہے۔ ہم سب اس کے بارے میں سنتے رہتے ہیں۔‘‘