ہمیں کہا جارہا ہے … یقین دلایا جارہا ہے کہ ہم ایک مہذب دنیا میں رہ رہے ہیں… پہلے سے بہتر اور بہت بہتر دنیا میں رہ رہے ہیں ‘ ایک محفوظ دنیا میں رہ رہے ہیں… ایک ترقی یافتہ دنیا میں رہ رہے ہیں ۔کیا واقعی ایسا ہے …؟کیا آپ بھی سمجھتے ہیں کہ ہم سچ میں ایک مہذب دنیا میں رہ رہتے ہیں…؟آپ کا جواب تو ہمیں معلوم نہیں ہے اور… اور بالکل بھی نہیں ہے‘ لیکن… لیکن ہمارے لئے اس بات پر یقین کرنا مشکل ہو رہا ہے کہ … کہ ہم ایک مہذب دنیا مین رہ رہے ہیں… اس کے واسی ہیں ۔ہمیں تو لگتا ہے کہ ۲۱ویں صدی میں بھی معاملہ وہی ہے… جس کی لاٹھی اس کی بھینس والا معاملہ… اس میں کوئی فرق ‘ کوئی تبدیلی نہیں آئی ہے اور… اور بالکل بھی نہیں آئی ہے۔ الٹا یہ ہوا ہے کہ جس کی لاٹھی اس کی بھینس نہیںبھینسیں ہیں ۔روس، یوکرین میں جو کررہا ہے ‘ کم و بیش دو برسوں سے کررہا ہے ‘ اسرائیل غزہ میں کررہا ہے‘پانچ چھہ ماہ سے کررہا ہے …وہ تو اسی ایک بات کی چغلی کھا رہا ہے‘ کسی اور بات کی نہیں ‘بالکل بھی نہیں ۔روس کے پاس لاٹھی ہے‘اسرائیل کے پاس بھی لاٹھی ہے… ہمارا مطلب ہے ان کے پاس طاقت ہے ‘ وہ اور اس طاقت کے بل پر معصوموں کی زندگیوں سے کھیل رہے ہیں … یقینا یوکرین مزاحمت کررہا ہے ‘ غزہ میں فلسطینی مزاحمت کررہے ہیںلیکن … لیکن کب تک کہ ان دوممالک کا آپس میں کوئی موازنہ نہیں ہے اور… اور بالکل بھی نہیں ہے ۔روس کی یوکرین پر حملے اور قبضہ کرنے کی اپنی کوئی دلیل ہو سکتی ہے… لیکن صاحب اسرائیل غزہ میں جو کچھ بھی کررہا ہے ‘اس کی کوئی دلیل ‘کوئی جواز ‘کوئی وضاحت نہیں ہے اور بالکل بھی نہیں ہے… وہ بھی اب جب ہمیں یقین دلاجارہا ہے‘ قسمیں کھائی جا رہی ہیں کہ ہم ایک مہذب دنیا میں رہ رہے ہیں … ہم اس کا حصہ ہیں۔لیکن کیسی مہذب دنیا جس کی آنکھوں کے سامنے ایک طاقتور ملک اپنے ایک کمزور پڑوسی ملک پر حملہ کر سکتا ہے… وہاں خون کی ہولی کھیل سکتا ہے ‘ اور یہ مہذب دنیا زبانی جمع خرچ سے زیادہ کچھ نہیں کررہی ہے… اسے اس سے زیادہ کچھ کرنے کی ضرورت محسوس نہیں ہو رہی ہے اور… او ر بالکل بھی نہیں ہو رہی ہے ۔ صاحب اگر یہی مہذب دنیا ہے‘ اگر ہم اسی کو مہذب دنیا کہتے ہیں تو… تو ہم ایسی مہذب دنیا پر لعنت بھیج دیتے ہیں اور… اور ہزار بار بھیج دیتے ہیں۔ ہے نا؟