آٹھ اضلاع میں برفانی تودے گر آنے کی وارننگ جاری

سرینگر//
جموںکشمیر ڈزاسٹر مینجمنٹ اتھارٹی (جے کے ڈی ایم اے ) نے برف وباراں کی پیش گوئی کے پیش نظر یونین ٹریٹری کے۸؍اضلاع میں اگلے چوبیس گھنٹوں کے دوران برفانی تودے گر آنے کی وارننگ جاری کی ہے ۔
ڈزاسٹر مینجمنٹ اتھارٹی کے ایک ترجمان نے ہفتے کو بتایا کہ جموں وکشمیر کے بانڈی پورہ، بارہمولہ، گاندربل، کپوارہ، ڈوڈہ، کشتواڑ، پونچھ اور رام بن کے پہاڑی علاقوں میں اگلے چوبیس گھنٹوں کے دوران درمیانی درجے کے برفانی تودے گر آنے کا امکان ہے ۔
حکام نے لوگوں سے احتیاط برتنے کی تاکید کی ہے اور جن علاقوں میں برفنای تودے گر آنے کے خطرات رہتے ہیں وہاں جانے سے اجتناب کرنے کو کہا ہے ۔
بتادیں کہ محکمہ موسمیات کی پیش گوئی کے مطابق جموں وکشمیر میں۱۷فروری کی شام سے۲۱فروری کی دوپہر تک وسیع پیمانے پر برف و باراں کا امکان ہے اور اس دوران پہاڑی علاقوں میں بھاری برف باری ہوسکتی ہے ۔
محکمہ نے کہا کہ برف باری کے باعث پہاڑی علاقوں کی سڑکوں بشمول مغل روڈ، سنتھن ٹاپ، سادھنا اور زوجیلا پاس پر ٹریفک کی نقل و حمل بند ہوسکتی ہے ۔
حکام نے مسافروں سے کہا ہے کہ وہ سفر اختیار کرنے سے قبل ٹریفک حکام سے رابطہ کریں۔
اس دوران کشمیر کے علاقے میں رات کا درجہ حرارت صفر کی سطح سے اوپر جانے کے بیچ ممکنہ برفباری سے نمٹنے کی تیاریاں جاری ہیں۔
سرینگر میں محکمہ موسمیات کے مرکز نے کہا کہ ہفتہ کی رات سے جموں و کشمیر اور ملحقہ علاقوں میں بارش کا طویل سلسلہ شروع ہونے کا امکان ہے جو۲۱ فروری کی دوپہر تک جاری رہے گا۔
اس سال، جموں و کشمیر میں۲۸جنوری سے۳فروری کے درمیان ہلکی سے درمیانی برفباری کے صرف دو ادوارکے ساتھ طویل خشک موسم دیکھا گیا۔
گزشتہ برفباری کے مقابلے میں اس بار گیلے موسم کی پیش گوئی شدید ہونے کی توقع ہے۔
محکمہ موسمیات سرینگر کے ڈائریکٹر مختار احمد نے کہا کہ۱۷فروری کی دوپہر تک موسم جزوی طور پر ابر آلود رہے گا جس کے بعد موسم ی سرگرمیوں میں اضافہ متوقع ہے جس سے رات گئے بالائی علاقوں میں ہلکی برفباری ہوگی۔
احمد نے کہا کہ ۱۸فروری کو کشمیر کے مختلف حصوں کے درمیانی اور بالائی علاقوں میں شمالی ، شمال مغربی ، وسطی اور جنوبی کشمیر کے الگ الگ اونچے علاقوں میں شدید برفباری کا امکان ہے۔
اس دوران وادی کے شبانہ درجہ حرارت میں قدرے بہتری واقع ہوئی ہے ۔
محکمے کے ایک ترجمان کے مطابق وادی کے شبانہ درجہ حرارت میں بہتری واقع ہوئی ہے ۔ گرمائی دار الحکومت سری نگر میں کم سے کم درجہ حرارت۰ء۳ڈگری سینٹی گرید ریکارڈ کیا گیا جہاں گذشتہ شب کا درجہ حرارت منفی۶ء۱ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۲ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۴ء۳ڈگری سینٹی گریڈ ریکارڈ ہوا تھا۔
وادی کے ایک اور سیاحتی مقام پہلگام میں کم سے کم درجہ حرارت منفی۷ء۰ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۲ء۴ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت۳ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۴ء۲ڈگری سینٹی گریڈ ریکارڈ ہوا تھا۔
قصبہ قاضی گنڈ میں کم سے کم درجہ حرارت۰ء۱ڈگری سینٹی گریڈ کیا گیا جہاں گذشتہ شب کا درجہ حرارت منفی۲ء۱ڈگری سینٹی گریڈ ریکارڈ ہوا تھا۔