’کھیلو انڈیا سرمائی کھیلوں کیلئے تمام انتظامات مکمل‘

سرینگر//
صوبائی کمشنر کشمیر ‘وجے کمار بدھوری کا کہنا ہے کہ۲۱فروری سے شروع ہونے والی کھیلو انڈیا سرمائی کھیلوں کیلئے تمام انتظامات کو مکمل کیا گیا ہے ۔
بدھوری نے کہا کہ اب کشمیر میں برف باری بھی ہوئی ہے لہذا یہ گیمز ۲۱فروری سے باقاعدہ شروع ہوں گی۔
صوبائی کمشنر نے ان باتوں کا اظہار ہفتے کو یہاں نامہ نگاروں کے ساتھ بات کرنے کے دوران کیا۔
بدھوری نے کہا’’کھیلو انڈیا سرمائی کھیلوں کیلئے تمام تیاریوں کو مکمل کیا گیا ہے اور اب یہاں برف باری بھی ہوئی ہے لہذا یہ گیمز۲۱فروری سے شروع ہوں گی‘‘۔
صوبائی کمشنر کا کہنا تھا کہ پہلے یہاں سیاحتی مقامات و دیگر جگہوں پر بیت الخلا کا انتظام نہیں ہوتا تھا لیکن اب اس کمی کو بھی پورا کیا گیا ہے ۔
بدھوری نے کہا کہ سیاحتی مقامات پر ہی نہیں بلکہ ہائی وے پر بھی بیت الخلا کا انتظام نہیں ہوتا تھا۔انہوں نے کہا کہ اب ان تمام مقامات پر بیت الخلا کا بندو بست کیا گیا ہے ان کی اچھی طرح سے دیکھ ریکھ کی جا رہی ہے ۔
کھیلو انڈیا سرمائی کھیلوں کے چوتھے ایڈیشن کا انعقاد سیاحتی مقام گلمرگ میں۲۱فروری سے ہو رہا ہے ۔ کھیلوں کا یہ ایونٹ ۲۶فروری کو اختتام پذیر ہوگا۔
سرکاری ذرائع کے مطابق امسال اس ایونٹ میں ملک کی مختلف ریاستوں سے تعلق رکھنے والے قرب ۴سو کھلاڑی حصہ لے رہے ہیں۔بتادیں کہ کھیلو انڈیا سرمائی کھیلوں کا پہلا ایونٹ فروری اور مارچ سال۲۰۲۰میں لیہہ اور گلمرگ میں منعقد ہوا تھا۔