اوڑی سڑک حادثے میںمزید دو زخمی جاں بحق‘کل اموات ۱۰ ہو گئیں

سرینگر//
شمالی کشمیر کے ضلع بارہمولہ کے اوڑی علاقے میں بدھ کی دوپہر کو پیش آنے والے دلدوز سڑک حادثے میں زخمی ہونے والے مزید دو افراد دم توڑ گئے جس کے ساتھ مہلوکین کی تعداد بڑھ کر۱۰تک پہنچی ہے ۔
سرکاری ذرائع نے بتایا کہ اوڑی حادثے میں زخمی ہونے والے مزید دو افراد گذشتہ شب دیر گئے ہسپتال میں زخموں کی تاب نہ لا کر دم توڑ گئے ۔
ذرائع نے زخمیوں کی شناخت شبیر احمد ولد عبدالغنی اور شبیر احمد ولد محمد عبداللہ ساکنان بوجتھالن کے بطور ہوئی ہے ۔
بتادیں کہ اوڑی کے بوجھتلان کے مقام پر بدھ کی دو پہرکو ایک ٹاٹا سومو گاڑی ڈرائیور کے قابو سے باہر ہوکر دو سوفٹ گہری کھائی میں جاگری جس کے نتیجے میں گاڑی میں سوار سبھی مسافر شدید طورپر زخمی ہوئے ۔
حادثے کی اطلاع ملتے ہی پولیس ، فوج اور مقامی لوگ جائے موقع پر پہنچے اور امدادی کارروائی شروع کی جس دوران ڈرائیور سمیت ۱۴؍افراد کو تشویشناک حالت میں ہسپتال منتقل کیا گیا جہاں پر۸مسافروں کو مردہ قرار دیا گیا۔