کولگام میں ایک بدنام زمانہ منشیات فروش کی جائیداد قرق:پولیس

سرینگر//
پولیس نے جنوبی کشمیر کے ضلع کولگام کے قیموہ علاقے میں ایک بد نام زمانہ منشیات فروش کی جائیداد کو قرق کر دیا۔
پولیس ترجمان نے اپنے ایک بیان میں اس جائیداد منسلکی کی کارروائی کے بارے تفصیلات فراہم کرتے ہوئے کہا کہ منشیات فروشی کے خلاف کارروائیوں کو جاری رکھتے ہوئے کولگام پولیس نے منگل کے روز قیموہ علاقے میں این ڈی پی ایس کے متعلقہ دفعات کے تحت ایک بدنام زمانہ منشیات فروش کے دو منزلہ رہائشی مکان کو قرق کر دیا۔
پولیس نے اس منشیات فروش کی شناخت معشوق احمد شیخ ولد غلام قادر شیخ ساکن کھڈونی قیموہ کے بطور کی ہے ۔
بیان میں کہا گیا’’کولگام پولیس کی طرف سے کی جانے والی تحقیقات کے دوران قرق شدہ جائیداد کی شناخت غیر قانونی طور حاصل شدہ جائیداد کے بطور ہوئی ہے ‘‘۔
بیان میں کہا گیا’’یہ جائیداد پہلی نظر میں مالک کی جانب سے منشیات اور سائیکو ٹراپک مواد کی غیر قانونی اسمگلنگ سے حاصل کی گئی تھی‘‘۔انہوں نے کہا کہ مذکورہ منشیات فروش پولیس اسٹیشن قیموہ میں درج ایف آئی آر میں ملوث ہے ۔
اس دوران جموں وکشمیر پولیس نے سوپور ، بارہ مولہ اور بڈگام میں گیارہ منشیات فروشوں کی گرفتاری عمل میں لا کر ان کے قبضے سے ممنوع نشیلی اشیائبرآمد کرکے ضبط کی ہے ۔
پولیس کے ایک ترجمان نے بتایا کہ شمالی ضلع بارہ مولہ کے سلطان پورہ پٹن علاقے میں ناکہ چیکنگ کے دوران سجاد رسول ڈار ولد غلام رسول ڈار ساکن پلہالن پٹن کو روک کر اس کی جامہ تلاشی لی گئی جس دوران اس کے قبضے سے۵۳گرام چرس جیسی نشیلی اشیائبرآمد ہوئی۔ پولیس نے منشیات فروش کو موقع پر ہی دھر دبوچ کر سلاخوں کے پیچھے دھکیل دیا۔
ترجمان کے مطابق اوڑی پولیس نے لاگہامہ شاہراہ پر فاریسٹ ہٹ کے نزدیک ناکہ چیکنگ کے دوران چار افراد جن کی شناخت نوخیز خان آعوان ولد کالو خان ، یاسر احمد خان ولد شکیل احمد ساکنان پرنپلن ، عبدالوحید گنائی ولد عبدالقیوم ساکن تلہ واری اور سبط حسن ولد ابن حسن ساکن قلعہ کرتارپور بجنور اتر پردیش حال اوڑی کے بطور ہوئی کی گرفتاری عمل میں لا کر ان کے قبضے سے ۷۰گرام چرس جیسی نشیلی اشیا ء برآمد کی۔
ادھر سوپور پولیس نے ہادی پورہ چوک میں تلاشی کے دوران تین افراد جن کی شناخت فاروق احمد ملہ عرف ہلال ولد عبدالرحیم ساکن ہادی پورہ رفیع آباد، فردوس احمد ڈار ولد محمد سلطان ڈار اور ریاض احمد گنائی ولد غلام محمد گنائی ساکنان ربن کے بطور ہوئی کو دھر دبوچ کر ان کے قبضے سے ایک سو گرام چرس‘۴۴سو نقدی اور تین موبائیل فون برآمد کرکے ضبط کئے ۔
پولیس ترجمان نے بتایا کہ رفیع آباد پولیس نے لائسر کراسنگ کے نزدیک ایک شخص جس کی شناخت معراج الدین میر ولد عبدالخالق میر ساکن عمر کالونی چھجہ ہامہ کے بطور ہوئی کو روک کر اس کی تلاشی لی جس دوران اس کے قبضے سے پچاس گرام چرس کے ساتھ ساتھ تیرہ ہزار۵۰سو روپے نقدی اور موبائیل فون برآمد ہوا۔
پولیس نے مذکورہ منشیات فروش کو موقع پر ہی دھر دبوچ کر سلاخوں کے پیچھے دھکیل دیا۔
وسطی ضلع بڈگام میں انٹرنیشنل ائرپورٹ کے نزدیک پولیس نے ماروتی آلٹو کو روک کر گاڑی کی تلاشی لی جس دوران آلٹو سے۷۰گرام چرس جیسی اشیاء اور۵۸نشہ آور ادویات کے سٹرپس برآمد ہوئے ۔
علاوہ ازیں خانصاحب پولیس نے الحدیث مسجد شریف کے نزدیک ایک مشتبہ نوجوان جس کے ہاتھ میں دو بیگ تھے کو رکنے کا اشارہ کیا۔ پولیس پارٹی کو دیکھتے ہی نوجوان نے راہ فرار اختیار کرنے کی کوشش کی تاہم پولیس ٹیم نے پیشہ وارانہ صلاحیتوں کو بروئے کار لا کر نوجوان کو دھر دبوچا اور اس کے قبضے سے۲کلو گرام چرس گردہ اور۳۸۰گرام ممنوع نشیلی اشیاء برآمد کی ۔
نوجوان کی شناخت خورشید احمد میر ولد غلام محمد میر ساکن خانصاحب کے بطور ہوئی ہے ، پولیس نے منشیات فروش کے خلاف این ڈی پی ایس ایکٹ کے تحت کیس درج کرکے تحقیقات شروع کی ہے ۔
دریں اثنا پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کریں۔
پولیس کا کہنا ہے کہ منشیات فروشی سماج کے لئے ناسور بن چکی ہے لہذا اس کا قلع قمع کرنے کی خاطر ہر ایک کو پولیس کے ساتھ اپنا دست تعاون فراہم کرنا چاہئے ۔