سرینگر//(ویب ڈیسک)
سعودی حج و عمرہ و زیارت کی قومی کمپنی کے رکن سعید باحشوان نے کہا ہے کہ ’تین ماہ ‘رجب‘شعبان اور رمضان کے دوران میں عمرہ زائرین بڑی تعداد میں مکہ مکرمہ پہنچیں گے۔’’ یہ تینوں مہینے عمرہ سیزن کے حوالے سے مصروف ترین ہیں‘‘۔
العربیہ نیٹ کے مطابق سعید باحشوان نے کہا ’’۲۷۰ عمرہ کمپنیاں اور ادارے زائرین کی آمد سے ان کی وطن واپسی تک سروسز فراہم کر رہی ہیں‘‘۔انہوں نے کہا کہ ’اعلٰی قیادت کی جانب سے ہدایت کی گئی ہے کہ زائرین کو مقدس شہروں میں ہر ممکن بہتر سہولت فراہم کی جائے، اس کی نگرانی وزارت حج و عمرہ کر رہی ہے۔‘
’عمرہ کمپنیاں اور ادارے مکہ مکرمہ اور مدینہ منورہ میں زائرین کی منفرد میزبانی کے لیے تیار ہیں۔‘ دونوں شہروں کے ہوٹل زائرین کی غیرمعمولی تعداد کی آمد پر زیادہ مصروف ہوں گے۔علاوہ ازیں پبلک ٹرانسپورٹ، ریستورانوں، شاپنگ سینٹرّز اور بازاروں میں بھی رش رہے گا۔
عمرہ زائرین اپنے پیاروں کے لیے اس سال بھی تحائف خریدنے کا اہتمام کریں گے۔
سعید باحشوان کا یہ بھی کہنا تھا کہ ’پاکستان، انڈیا، انڈونیشیا، ترکیہ، مصر، تیونس، الجزائر، لیبیا، ازبکستان، ملائیشیا اور دیگر ملکوں سے زائرین عمرہ ادا کرنے اور اپنی زندگی کے انمول روحانی لمحات حرمین شریفین میں گزارنے کے لیے مکہ مکرمہ اور مدینہ منورہ پہنچنے لگے ہیں۔‘
اس دوران سعودی وزیرِ حج و عمرہ ڈاکٹر توفیق الربیعہ نے کہا ہے کہ حج ۲۰۲۴ کے دوران ۳۵سے زیادہ کمپنیاں زائرین کی خدمت کریں گی۔
الاخباریہ کے مطابق پیر کو حج و عمرہ کانفرنس کے افتتاحی اجلاس سے خطاب کرتے ہوئے ڈاکٹر توفیق الربیعہ نے کہا کہ ’کانفرنس میں ۸۰سے زیادہ ملکوں کے وزرا اور عہدیدار شریک ہیں۔ تمام شریک ممالک کے ساتھ حج انتظامات کے حوالے سے معاہدے ہوگئے ہیں۔‘
’اس سال سہولتوں میں اضافے کے باعث عمرہ زائرین کی تعداد ایک کروڑ ۳۵ لاکھ ۵۰ ہزار تک پہنچ گئی ہے۔ یہ اب تک کی سب سے بڑی تعداد ہے۔ اس میں۵۸ فیصد اضافہ ہوا۔ تقریباً پچاس لاکھ زیادہ عمرہ زائرین آئے ہیں۔‘
انہوں نے کہا کہ ’اس سال مدینہ منورہ میں بھی عمرہ کانفرنس اور نمائش کا اہتمام ہوگا۔‘
الاخباریہ کے مطابق سعودی وزیر حج نے کہا کہ ’سعودی عرب اپنے یہاں تاریخی مقامات کو جدید خطوط پر استوار کر رہا ہے۔ اب تک دس نئے تاریخی مقامات پر کام مکمل کرلیا گیا ہے جبکہ ۱۸؍ ایسے مقامات تیار کیے گئے ہیں جن سے زائرین کی معلومات میں اضافہ ہوگا۔ بارہ تاریخی مقامات کو جدید خطوط پر استوار کرنے کا کام کیا جا رہا ہے۔‘
گزشتہ سال حج و عمرہ خدمات فراہم کرنے والے ۴۰ ہزار سے زیادہ اہلکاروں کو ٹریننگ دی گئی جبکہ اس سال ایک لاکھ بیس ہزار سے زیادہ اہلکاروں کو ٹریننگ دی جا رہی ہے۔